बंगळूरू : भारताचा स्टार क्रिकेटर विराट कोहलीच्या पब-रेस्टॉरंटवर बंगळूरू पोलिसांनी गुन्हा दाखल केला आहे. विराटच्या वन8 कम्यून या पब- रेस्टॉरंटमध्ये नो स्मोकिंग झोन नसल्याने हा गुन्हा दाखल करण्यात आला आहे. मात्र, यासंदर्भात अद्याप क्रिकेटर विराट कोहली अथवा रेस्टॉरंटकडून कुठल्याही प्रकारचे भाष्य करण्यात आलेले नाही.
मिळालेल्या माहितीनुसार, बंगळुरूच्या कब्बन पार्क पोलिसांनी एका विशेष अभियानांतर्गत एकूण ५ बार आणि रेस्टॉरंट विरोधात कारवाई केली आहे. यात विराट कोहलीच्या मालकीच्या वन ८ कम्यून पब आणि रेस्टॉरंटचाही समावेश आहे. या पबमध्ये नो स्मोकिंग झोन नाही, असे पोलिसांना आढळून आले. यामुळे त्यांनी, सिगारेट आणि इतर तंबाखू उत्पादने कायद्याच्या तरतुदींचे उल्लंघन केल्याबद्दल स्वतःहूनच केस दाखल केली आहे.
कोहलीच्या पबवर कायदेशीर कारवाई होण्याची ही पहिलीच वेळ नाही. तर गेल्या वर्षाच्या जुलै महिन्यातही वन ८ कम्यून पब आणि रेस्टॉरंट विरोधात केस दाखल केली होती. जुलै, २०२४ मध्ये वन ८ कम्यून पबच्या मॅनेजरवर, पब बंद करण्यासंदर्भातील वेळेच्या नियमांचे उल्लंघन केल्यावरून एफआयआर दाखल करण्यात आली होती. कब्बन पार्क पोलीस ठाण्यात दाखल करण्यात आलेल्या एफआयआरनुसार, कस्तूरबा रोडवरील वन ८ कम्यून पब ६ जुलैला बंद करण्याच्या वेळेनंतरही, १.२० वाजेपर्यंत खुलाच होता आणि ग्राहकांना सर्व्हिस देत होता. विराट कोहली हा वन ८ कम्यूनचा मालक आहे. हे रेस्टॉरंट बंगळुरू येथे डिसेंबर, २०२३ ला सुरू करण्यात आले आहे. या रेस्टॉरंटच्या शाखा दिल्ली, मुंबई, पुणे, बंगळुरू, कोलकाता आणि गुरुग्राम सारख्या शहरांत आहेत.
