नवी दिल्ली : देशाचे माजी पंतप्रधान राजीव गांधी यांना श्रद्धांजली अर्पण करण्यासाठी आयोजित करण्यात आलेली राजीव ज्योती सद्भावना यात्रा मंगळवारी दिल्लीत पोहोचली. सलग ३४व्या वर्षी ही यात्रा तमिळनाडूच्या श्रीपेरुम्बुदुरहून निघाली, जिथे १९९१ मध्ये राजीव गांधी यांची हत्या झाली होती. काँग्रेस पक्षाच्या अधिकृत ‘एक्स’ अकाउंटवरून मंगळवारी या यात्रेची माहिती देण्यात आली. पक्षाकडून करण्यात आलेल्या पोस्टमध्ये म्हटले आहे की, माजी पंतप्रधान राजीव गांधी यांना श्रद्धांजली म्हणून मागील ३४ वर्षांपासून ही यात्रा आयोजित केली जाते. यंदाचीही यात्रा श्रीपेरुम्बुदुरहून सुरू होऊन आज दिल्लीमध्ये मल्लिकार्जुन खरगे यांनी ज्योती ग्रहण करून संपन्न झाली.
काँग्रेसच्या पोस्टमध्ये पुढे म्हटले आहे की, यात्रेचा उद्देश देशभरात सद्भावना, एकता आणि लोकशाही मूल्यांविषयी जनजागृती करणे हा आहे. काँग्रेस कार्यकर्ते ही यात्रा परंपरेप्रमाणे पार पाडतात आणि राजीव गांधी यांच्या विचारांची व योगदानाची आठवण ठेवण्याचे साधन मानतात. विशेष म्हणजे, ही यात्रा दरवर्षी ९ ऑगस्टला सुरू होते आणि २० ऑगस्टला राजीव गांधी यांच्या जयंतीपूर्वी दिल्लीत पोहोचते. यंदाही यात्रा ठरलेल्या कार्यक्रमानुसार पूर्ण झाली आहे.
