नवी दिल्ली : सुप्रीम कोर्टात हवामान कार्यकर्ते सोनम वांगचुक यांची व्हिडिओ कॉन्फरन्सिंगद्वारे न्यायालयात हजेरीची मागणीला केंद्र सरकारने कडाडून विरोध दर्शवला आहे, ज्यामुळे ही सुनावणी आता १५ डिसेंबरपर्यंत पुढे ढकलण्यात आली आहे. वांगचुक सध्या जोधपूर कारागृहात राष्ट्रीय सुरक्षा कायदा (एनएसए) अंतर्गत बंद आहेत. हवामान कार्यकर्ते वांगचुक यांच्या पत्नी आंगमो यांनी याचिका दाखल करून सांगितले आहे की त्यांची अटक पूर्णपणे बेकायदेशीर आणि मनमानी आहे. सुनावणीदरम्यान वरिष्ठ अधिवक्ता कपिल सिब्बल यांनी न्यायालयाला सांगितले की वांगचुक तुरुंगातून व्हिडिओ कॉन्फरन्सिंगद्वारे जोडले जाऊ इच्छितात. मात्र केंद्राच्या वतीने उपस्थित सॉलिसिटर जनरल तुषार मेहता यांनी यास विरोध दर्शविताना म्हटले की असे केल्यास देशभरातील सर्व बंद्यांना अशीच सुविधा द्यावी लागेल, त्यामुळे हा अनुरोध मान्य करू नये.
न्यायालयाने यापूर्वीच केंद्र आणि लडाख प्रशासनाला उत्तर दाखल करण्यासाठी वेळ दिला होता. २४ नोव्हेंबर रोजीही केंद्राने अतिरिक्त वेळ मागितला होता, ज्यामुळे सुनावणी पुढे ढकलली गेली. २९ ऑक्टोबर रोजी सर्वोच्च न्यायालयाने आंगमो यांच्या सुधारित याचिकेवर केंद्र आणि लडाख प्रशासनाकडून उत्तर मागितले होते. आता न्यायालयाने स्पष्ट केले आहे की पुढील सुनावणी १५ डिसेंबर रोजी होईल. सोनम वांगचुक यांना २६ सप्टेंबर रोजी राष्ट्रीय सुरक्षा कायद्यांतर्गत अटक करण्यात आली होती. त्याच्या दोन दिवस आधी लडाखमध्ये राज्याच्या दर्जाची आणि सहावी अनुसूची लागू करण्याच्या मागणीसाठी झालेल्या आंदोलनात हिंसा झाली होती. या चकमकींमध्ये चार जणांचा मृत्यू झाला होता आणि ९० जण जखमी झाले होते. सरकारचा आरोप आहे की वांगचुक यांनी वातावरण भडकावले, तर कुटुंबाचे म्हणणे आहे की त्यांचा याच्याशी काहीही संबंध नाही.
