नवी दिल्ली : दिल्लीहून मँचेस्टर (यूके)कडे जाणारी इंडिगोची फ्लाइट यू-टर्न घेऊन पुन्हा दिल्लीला परतत आहे. इंडिगोची फ्लाइट 6E33 इथिओपियाच्या सीमेजवळ पोहोचल्यानंतर अचानक हवेतूनच परत वळली. त्यामुळे प्रवाशांमध्ये काही काळ गोंधळ आणि भीतीचे वातावरण निर्माण झाले. फ्लाइट ट्रॅकिंग सेवानुसार, दिल्लीहून उड्डाण केल्यानंतर इंडिगोचे विमान इथिओपियाच्या हवाई क्षेत्राजवळ पोहोचताच शेवटच्या क्षणी हवाई क्षेत्रावर निर्बंध लागू झाल्यामुळे अचानक यू-टर्न घेत 7 तास उड्डाण केल्यानंतरपरत फिरले. त्यानंतर विमानाने पुन्हा भारतीय हवाई क्षेत्रात प्रवेश केला.
इंडिगोने दिलेल्या निवेदनात सांगितले की शेवटच्या क्षणी हवाई क्षेत्रावर निर्बंध लागू झाल्यामुळे एअरलाईनला हा निर्णय घ्यावा लागला. इंडिगोच्या प्रवक्त्याने सांगितले, “मध्यपूर्व आणि आसपासच्या भागातील बदलत्या परिस्थितीमुळे आमच्या काही फ्लाइट्सना अधिक लांब मार्गाने जावे लागू शकते किंवा त्यांचा मार्ग बदलावा लागू शकतो.”ते पुढे म्हणाले, “पश्चिम आशियातील परिस्थितीमुळे शेवटच्या क्षणी हवाई क्षेत्रावर निर्बंध लागू करण्यात आले. त्यामुळे दिल्लीहून मँचेस्टरकडे जाणारी आमची फ्लाइट 6E 033 ला पुन्हा मूळ ठिकाणी परतावे लागले.”
इंडिगोने असेही सांगितले की, “उड्डाण पुन्हा सुरू करण्याच्या शक्यता तपासण्यासाठी आम्ही संबंधित अधिकाऱ्यांशी संपर्कात आहोत. नेहमीप्रमाणे आमच्या प्रवाशांची, क्रू सदस्यांची आणि विमानाची सुरक्षितता ही आमच्यासाठी सर्वोच्च प्राधान्य आहे.” इंडिगोच्या मते, मध्यपूर्वेत बदलत्या परिस्थितीमुळे काही फ्लाइट्सना लांब मार्ग घ्यावा लागू शकतो किंवा त्यांना डायव्हर्जन करावे लागू शकते. हवाई क्षेत्रावर लावण्यात आलेल्या निर्बंधांमुळे दिल्लीहून मँचेस्टरकडे जाणारी इंडिगोची फ्लाइट 6E 033 परत वळवावी लागली.
मध्यपूर्वेत सुरू असलेल्या तणावाच्या पार्श्वभूमीवर 26 फेब्रुवारीनंतर दिल्लीहून मँचेस्टरकडे जाणारी ही इंडिगोची पहिली फ्लाइट होती. दिल्लीहून मँचेस्टरकडे जाणारी ही फ्लाइट सुमारे 7 तास उड्डाण केल्यानंतर परत फिरली. माहितीनुसार, दिल्ली–मँचेस्टर मार्गाची ग्रेट-सर्कल अंतर सुमारे 6,829 किलोमीटर आहे आणि मार्ग व हवामानाच्या परिस्थितीनुसार या प्रवासाला साधारण 11 तास लागतात.
