पुणे : सलग सुट्ट्यांच्या पार्श्वभूमीवर मुंबई-पुणे द्रुतगती मार्गावर शनिवारी भीषण वाहतूक कोंडी झाली असून, या कोंडीत खासदार सुप्रिया सुळे यांनाही तब्बल दोन तास अडकून पडावे लागल्याची घटना समोर आली आहे. अमृतांजन पूल ते खोपोली एक्झिटदरम्यान वाहनांच्या लांबच लांब रांगा लागल्या असून, हजारो प्रवाशांना या कोंडीचा फटका बसत आहे.
सलग तीन दिवसांच्या सुट्ट्यांमुळे मुंबईकर मोठ्या प्रमाणात लोणावळा आणि पुण्याकडे निघाल्याने सकाळपासूनच एक्सप्रेस वेवरील वाहतूक मंदावलेली होती. मात्र दुपारपर्यंत परिस्थिती अधिकच गंभीर बनली आणि दोन तासांहून अधिक काळ वाहनांची सरकताही झाली नाही. विशेषतः मुंबईहून पुण्याकडे जाणाऱ्या लेनवर वाहनांच्या किलोमीटरच्या रांगा लागल्या होत्या. अनेकांनी सकाळी सात वाजता प्रवास सुरू करूनही दुपारपर्यंत त्याच ठिकाणी अडकून पडल्याचे सांगितले.
या वाहतूक कोंडीत अडकलेल्या सुप्रिया सुळे यांनी स्वतः व्हिडिओ तयार करून परिस्थिती मांडली. “आम्ही दोन तासांपासून इथेच अडकलो आहोत,” असे त्या सांगताना दिसतात. यावेळी त्यांनी शेजारील वाहनचालकांशी संवाद साधत त्यांच्या अडचणीही जाणून घेतल्या. काही प्रवाशांनी “सकाळी लवकर निघूनही अजूनही पुढे जाता आले नाही,” अशी नाराजी व्यक्त केली. या अनपेक्षित कोंडीमुळे प्रवाशांचा वेळ, इंधन आणि संयम या तिन्ही गोष्टींची मोठी परीक्षा पाहायला मिळाली.
