मुंबई : दक्षिण भारतीय सुपरस्टार प्रभासच्या बहुप्रतिक्षित ‘पॅन-इंडिया’ चित्रपट ‘फौजी’चा ‘फर्स्ट लूक’ आणि प्रदर्शनाची तारीख जाहीर करण्यात आली आहे. हनू राघवपुडी दिग्दर्शित हा चित्रपट एक ऐतिहासिक ‘ॲक्शन-ड्रामा’ आहे. पोस्टरसोबतच, निर्मात्यांनी प्रभासचा एक आक्रमक आणि प्रभावी लूक (अवतार) सादर केला असून, हा चित्रपट ३ डिसेंबर २०२६ रोजी जगभरातील चित्रपटगृहांमध्ये प्रदर्शित होणार असल्याचे जाहीर केले आहे.
प्रदर्शित पोस्टरमध्ये प्रभास पांढरे धोतर परिधान करून, रक्ताने माखलेल्या अवस्थेत आणि हातात बंदूक घेऊन मृतदेहांच्या मधोमध बसलेला दिसत आहे. त्याचा हा गंभीर आणि आक्रमक लूक युद्धाच्या आणि संघर्षाच्या पार्श्वभूमीवर आधारित असलेल्या या चित्रपटाच्या कथानकाची झलक देतो. मिळालेल्या माहितीनुसार, या चित्रपटात प्रभास ब्रिटीश सैन्यात कार्यरत असलेल्या एका भारतीय सैनिकाची भूमिका साकारणार आहे.
‘मैत्री मुव्ही मेकर्स’च्या बॅनरखाली निर्मित या चित्रपटातून सोशल मीडियावरील लोकप्रिय व्यक्तिमत्त्व इमानवी इस्माईल अभिनयाच्या क्षेत्रात पदार्पण करत आहे. तसेच, ज्येष्ठ अभिनेते मिथुन चक्रवर्ती, जया प्रदा आणि अनुपम खेर हे देखील महत्त्वपूर्ण भूमिकांमध्ये दिसणार असून, यामुळे चित्रपटाची स्टार-कास्ट अधिकच दमदार झाली आहे. ‘फौजी’ हा २०२६ मधील सर्वात बहुप्रतिक्षित ‘पॅन-इंडिया’ चित्रपटांपैकी एक मानला जात आहे. ऐतिहासिक पार्श्वभूमी, भव्य निर्मिती आणि प्रभासची दमदार ॲक्शन-ओरिएंटेड प्रतिमा यामुळे या चित्रपटाबद्दल प्रेक्षकांमध्ये आधीच प्रचंड उत्सुकता निर्माण झाली आहे.
