नवी दिल्ली : एफआयएच हॉकी विश्वचषकासाठी भारतीय हॉकी संघाच्या नवीन भगव्या जर्सीवरून निर्माण झालेल्या प्रश्नांच्या पार्श्वभूमीवर, हॉकी इंडियाने एक अधिकृत निवेदन जारी करून स्पष्ट केले की, जर्सीच्या रंगातील हा बदल हॉकीपटू आणि सपोर्ट स्टाफच्या शिफारशी आणि सखोल विचारविनिमयानंतर करण्यात आला आहे. संस्थेने म्हटले आहे की, हा निर्णय प्रामुख्याने तांत्रिक गरजेवर आधारित होता, इतर कोणत्याही कारणासाठी नाही. हॉकी इंडियाच्या म्हणण्यानुसार, हॉकीपटू आणि प्रशिक्षण कर्मचाऱ्यांना असे वाटले की पारंपरिक निळी जर्सी आंतरराष्ट्रीय हॉकीमध्ये प्रचलित असलेल्या निळ्या सिंथेटिक टर्फशी मिळतीजुळती आहे. यामुळे खेळाडूंना मैदानावर एकमेकांना ओळखणे आणि दृश्यमानता राखणे कठीण होत होते. परिणामी, हॉकीपटू आणि प्रशिक्षकांनी पिवळा किंवा भगवा यांसारखे पर्याय सुचवले.
निवेदनात म्हटले आहे की, सर्व सूचनांचा विचार केल्यानंतर भगवा रंग निश्चित करण्यात आला. हा रंग केवळ तांत्रिकदृष्ट्या योग्य नाही, तर भारतीय राष्ट्रध्वजाच्या तीन रंगांपैकी एक असल्याने तो शौर्य, त्याग आणि राष्ट्रीय अभिमानाचे प्रतीक देखील आहे. हॉकी इंडियाने स्पष्ट केले आहे की राष्ट्रीय संघाच्या जर्सीच्या रंगातील बदल नवीन नाहीत. व्यावहारिक आणि तांत्रिक गरजा पूर्ण करण्यासाठी संघाच्या जर्सीमध्ये वेळोवेळी बदल करण्यात आले आहेत. उदाहरणार्थ, २०१४ च्या एफआयएच हॉकी विश्वचषकादरम्यान भारतीय संघाने पिवळी जर्सी परिधान केली होती, तर २०१८ च्या एफआयएच हॉकी विश्वचषकासाठी संघाच्या जर्सीचा रंग आकाशी निळा होता आणि तिची रचना पूर्णपणे बदलण्यात आली होती.
हॉकी इंडियाने आपल्या निवेदनाचा समारोप करताना पुनरुच्चार केला की, सध्याचा भगव्या जर्सीचा निर्णय केवळ हॉकीपटू आणि प्रशिक्षकांकडून मिळालेल्या तांत्रिक अभिप्रायावर आणि राष्ट्रध्वजाशी संबंधित असलेल्या या रंगाच्या प्रतीकात्मक महत्त्वावर आधारित आहे. यामुळे हॉकीपटूंना मैदानावर अधिक चांगली दृश्यमानता मिळेल आणि संघाच्या कामगिरीवर सकारात्मक परिणाम होण्याची अपेक्षा आहे.
भारताचे माजी कर्णधार आणि ऑलिम्पिक गोल्ड क्वेस्टचे सीईओ, विरेन रासकिन्हा यांनी भगव्या रंगाला आक्षेप घेतला होता. त्यांनी ‘एक्स’ या सोशल मीडिया प्लॅटफॉर्मवर लिहिले, “मला हे मान्य करावेच लागेल की हॉकी इंडियाने खूप चांगले काम केले आहे, पण हा निर्णय लाजिरवाणा आहे. भारतीय संघाची ओळख आणि वारसा नेहमीच निळा रंग राहिला आहे. मी अनेक वर्षे अभिमानाने निळी जर्सी परिधान केली आहे. चाहत्यांनाही भारतीय संघाला निळ्या रंगात पाहायचे आहे. केशरी (भगव्या) रंगामागे काय तर्क आहे?”
पुढील महिन्यात नेदरलँड्स आणि बेल्जियममध्ये होणाऱ्या एफआयएच हॉकी विश्वचषक २०२६ मध्ये, भारतीय पुरुष आणि महिला हॉकी संघ त्यांच्या पारंपरिक निळ्या जर्सीऐवजी पहिल्यांदाच नवीन भगव्या रंगाच्या किटमध्ये मैदानात उतरतील. हॉकी इंडिया या जर्सीच्या रंगातील बदलाला तांत्रिक आणि व्यावहारिक निर्णय म्हणत असताना, काही माजी हॉकपटू याचा संबंध भारतीय हॉकीच्या पारंपरिक ओळखीशी जोडत आहेत. विश्वचषकाच्या अगदी आधी, या मुद्द्याने भारतीय हॉकीमध्ये एक नवा वाद सुरु झाला आहे.
