‘हनी ट्रॅप’मध्ये अडकून लीक केली संवेदनशील माहिती
नवी दिल्ली : भारतीय वायुसेनेच्या एका विंग कमांडरला पाकिस्तनच्या ‘हनी ट्रॅप’मध्ये अडकवून संवेदनशील संरक्षणविषयक माहिती लीक केल्याच्या आरोपावरून अटक करण्यात आली आहे. आरोपी अधिकारी सोशल मीडियाच्या माध्यमातून पाकिस्तानी गुप्तचर एजंट्सच्या संपर्कात आल्याचा संशय आहे. याबाबत भारतीय वायुसेनेच्या अधिकाऱ्यांनी सांगितले की, संबंधित अधिकाऱ्यावर लक्ष ठेवण्यात येत होते आणि सक्रिय देखरेखीदरम्यान त्याला पकडण्यात आले. त्यानंतर त्याला संबंधित कायदा अंमलबजावणी यंत्रणांच्या ताब्यात देण्यात आले. अशा प्रकारच्या प्रकरणांमध्ये अधिकृत गोपनीयता कायद्यांतर्गत शून्य सहनशीलतेचे धोरण असल्याचे भारतीय वायुसेनेने स्पष्ट केले आहे. सक्रिय गुप्तचर आणि देखरेख यंत्रणांच्या माध्यमातून अधिकाऱ्याच्या कथित हालचालींचा तपास करण्यात आला. तर दिल्ली पोलिसांच्या सूत्रांनुसार, विंग कमांडरवर संवेदनशील संरक्षणविषयक माहिती आणि गोपनीय कागदपत्रे शेअर केल्याचा आरोप आहे. या प्रकरणात अधिकृत गोपनीयता कायद्याच्या संबंधित तरतुदींनुसार गुन्हा दाखल करण्यात आला असून, आरोपी सध्या न्यायालयीन कोठडीत असल्याचे सांगण्यात येत आहे.
सूत्रांच्या माहितीनुसार, संबंधित अधिकारी कथितरित्या पाकिस्तानी गुप्तचर एजंट्सनी रचलेल्या ‘हनी ट्रॅप’चा बळी ठरला. त्याच्यावर एका सहकाऱ्याच्या मोबाईल फोनमध्ये डेटा चोरी करणारे सॉफ्टवेअर इन्स्टॉल केल्याचाही आरोप आहे. या माध्यमातून त्या उपकरणावर अनधिकृत नियंत्रण मिळवण्याचा प्रयत्न करण्यात आल्याचा संशय आहे.प्रकरणाशी संबंधित महत्त्वाची गुप्तचर माहिती भारतीय वायुसेनेच्या गुप्तचर शाखेने दिल्ली पोलिसांसोबत शेअर केल्यानंतर अटकेची कारवाई करण्यात आली. प्रकरणात हेरगिरीचे जाळे, लीक झालेली माहिती आणि आरोपीचे संपर्क याबाबत तपास यंत्रणांकडून पुढील चौकशी सुरू आहे.
