मुंबई : ‘लव्ह लॉटरी’ या क्राईम-सस्पेन्स आणि सामाजिक विषयावर आधारित चित्रपटाचे नवीन पोस्टर प्रदर्शित करण्यात आले आहे. या पोस्टरमध्ये हेली दारूवाला वधूच्या वेशात दिसत आहे, तर अक्षय ओबेरॉयचे पात्र विविध प्रश्न आणि गूढतेच्या जाळ्यात अडकलेले दिसून येत आहे. दोन्ही कलाकारांच्या या वेगळ्या रूपांमुळे चित्रपटाच्या कथानकाबद्दल प्रेक्षकांची उत्सुकता वाढली आहे. अरविंद पांडे दिग्दर्शित हा चित्रपट नातेसंबंध, विश्वास, गुन्हेगारी आणि सामाजिक समस्या या विषयांवर भाष्य करतो.
‘लव्ह लॉटरी’मध्ये पुरुषांच्या हक्कांचा संवेदनशील मुद्दा कथानकाचा एक महत्त्वाचा भाग म्हणून मांडण्यात आला आहे. निर्मात्यांच्या मते, एखाद्या विशिष्ट निष्कर्षाची सक्ती करण्याऐवजी, नातेसंबंधांमधील गुंतागुंत, सामाजिक मानसिकता आणि न्यायाशी संबंधित प्रश्न मनोरंजक व गूढ पद्धतीने प्रेक्षकांसमोर मांडण्याचा प्रयत्न या चित्रपटाद्वारे केला गेला आहे. दिग्दर्शक अरविंद पांडे यांनी सांगितले की, हा चित्रपट केवळ एक क्राईम-सस्पेन्स कथा नसून तो चर्चेस पात्र असलेल्या एका सामाजिक विषयालाही हाताळतो. लेखक अंकुर खत्री यांनी नमूद केले की, या कथेमध्ये सस्पेन्सची सांगड भावना आणि नातेसंबंधांशी अशा प्रकारे घातली आहे की, घडणाऱ्या घटनांबद्दल प्रेक्षकांच्या मनात सतत उत्सुकता आणि तर्क-वितर्क सुरू राहतात.
‘सिनेमा गंज फिल्म्स’च्या बॅनरखाली कुलदीप भार्गव (उर्फ तुषार) यांनी या चित्रपटाची निर्मिती केली आहे. पटकथा आणि कथा अंकुर खत्री यांनी लिहिली आहे. अक्षय ओबेरॉय आणि हेली दारूवाला यांच्याव्यतिरिक्त, या चित्रपटात कबीर दुहान सिंग, विजयंत कोहली, हेमंत पांडे, इंदिरा कृष्णन आणि संतोष शुक्ला यांच्याही महत्त्वपूर्ण भूमिका आहेत. नवीन व्ही. मिश्रा यांनी छायाचित्रण, प्रकाश झा यांनी संकलन आणि वरुण मिश्रा व अरविंद पांडे यांनी संगीत दिग्दर्शन केले आहे. ‘लव्ह लॉटरी’ १८ सप्टेंबर २०२६ रोजी चित्रपटगृहांमध्ये प्रदर्शित होणार आहे.
