नवी दिल्ली : पंतप्रधान नरेंद्र मोदी यांनी त्यांच्या दैनंदिन कामाचा एक व्हिडिओ सोशल मीडियावर शेअर केला आहे. या व्हिडिओमध्ये ते गाईंना चारा आणि मोरांना धान्य खाऊ घालताना दिसत आहेत. शनिवारी, स्वातंत्र्यदिनी, पंतप्रधानांना लाल किल्ल्यावर पोहोचण्यासाठी त्यांच्या निवासस्थानाहून लवकर निघावे लागले. पंतप्रधान मोदी निघण्यापूर्वीच गायी आणि मोर तिथे पोहोचले. पंतप्रधानांनी नेहमीप्रमाणे त्यांना स्वतःच्या हाताने चारा दिला.
पंतप्रधान मोदींनी रविवारी सोशल मीडियावर एक व्हिडिओ शेअर केला. व्हिडिओच्या कॅप्शनमध्ये त्यांनी लिहिले, “दररोज सकाळी माझ्या मित्रांना खाऊ घालणे हा माझा नित्यक्रम आहे. काल (१५ ऑगस्ट) सकाळी, मी लवकर निघणार आहे हे त्यांना कसेतरी कळले, म्हणून मी लाल किल्ल्याकडे निघत असताना ते मला भेटायला आले. नेहमीप्रमाणेच खास!” व्हिडिओमध्ये, पंतप्रधान मोदी निवासस्थानातून निघण्यापूर्वी गायी आणि मोर त्यांच्याजवळ येताना दिसतात. त्यानंतर पंतप्रधान स्वतःच्या हाताने त्यांना खाऊ घालताना दिसत आहेत.
