कीव : युक्रेनच्या ईशान्येकडील खारकीव भागात मंगळवारी रशियाने केलेल्या क्षेपणास्त्र हल्ल्यात किमान १० जणांचा मृत्यू, तर १७ जण जखमी झाल्याचे सांगण्यात येत आहे. हा हल्ला पेचेनीही गावाच्या मध्यवर्ती भागात झाला. या परिसरात निवासी इमारतींसोबतच दुकाने, कॅफे आणि पोस्ट ऑफिसही आहे. युक्रेनच्या अधिकाऱ्यांच्या माहितीनुसार, हल्ल्यात अनेक इमारती आणि वाहनांचेही नुकसान झाले आहे.
युक्रेनचे राष्ट्राध्यक्ष व्होलोदिमिर झेलेन्स्की यांनी सोशल मीडिया प्लॅटफॉर्म ‘एक्स’वर सांगितले की, रशियन सैन्याने सकाळच्या सुमारास पेचेनीही येथील एका गजबजलेल्या चौकाला लक्ष्य केले. या परिसरात पोस्ट ऑफिस आणि अनेक दुकाने होती, तसेच आजूबाजूला निवासी इमारती होत्या. झेलेन्स्की यांनी हल्ल्यानंतरची काही छायाचित्रेही शेअर केली. या छायाचित्रांमध्ये नुकसान झालेल्या इमारती, आगीच्या भक्ष्यस्थानी पडलेली वाहने तसेच जखमींना स्ट्रेचरवरून नेत असलेले बचाव कर्मचारी दिसत आहेत. हल्ल्यानंतर झेलेन्स्की यांनी रशियावर तीव्र टीका केली. “युक्रेन या रशियन हल्ल्याला निश्चितपणे प्रत्युत्तर देईल,” असे त्यांनी म्हटले.
दरम्यान, खारकीव प्रदेशाचे गव्हर्नर ओलेह सिनीहुबोव्ह यांनी हल्ल्यात १७ जण जखमी झाल्याची माहिती दिली. त्यांच्या म्हणण्यानुसार, क्षेपणास्त्र हल्ल्यात १० खासगी इमारतींसह एक कॅफे, पोस्ट ऑफिस, दुकान आणि किमान सात वाहनांचे नुकसान झाले आहे. युक्रेनच्या अभियोजक जनरल कार्यालयाने प्राथमिक माहितीनुसार, रशियाने या हल्ल्यात दोन लघु बॅंडेरोल क्रूझ क्षेपणास्त्रांचा वापर केल्याचे सांगितले.
एका स्थानिक अधिकाऱ्याने युक्रेनच्या सार्वजनिक प्रसारकला दिलेल्या माहितीनुसार, क्षेपणास्त्रे गावाच्या मध्यवर्ती भागात कोसळली. दरम्यान, या हल्ल्याबाबत रशियाकडून अद्याप कोणतीही अधिकृत प्रतिक्रिया समोर आलेली नाही.हल्ल्यानंतर आपत्कालीन सेवा आणि बचाव पथके घटनास्थळी दाखल झाली असून, मदत आणि बचावकार्य सुरू करण्यात आले. प्रभावित परिसरातील नुकसान झालेल्या इमारती आणि वाहनांमध्ये अडकलेल्या जखमींना बचाव कर्मचाऱ्यांनी बाहेर काढले.
