श्रीनगर : श्रीनगरमध्ये आज, सोमवारी सुरक्षा दल आणि दहशतवाद्यांमध्ये चकमक उडाली आहे. दहशतवाद्यांना ठार मारण्यासाठी लष्कराच्या जवानांनी ‘ऑपरेशन महादेव’ सुरू केले आहे. मुलनारच्या जंगलात दोन ते तीन दहशतवादी लपले आहेत. सुरक्षा दलांनी संपूर्ण परिसर सील केला आहे आणि मोठ्या प्रमाणात शोध मोहीम राबविली जात आहे. दरम्यान २ दहशतवादी ठार झाल्याची माहिती पुढे आली आहे. अद्याप सुरक्षा दलांनी यासंदर्भात तपशिल दिलेला नाही.
सैन्याच्या सूत्रांनी दिलेल्या माहितीनुसार सोमवारी श्रीनगरमधील हरवनमधील लिडवास भागात दहशतवादी आणि सुरक्षा दलांमध्ये चकमक सुरू झाली. दरम्यान, अधिकाऱ्यांनी सांगितले की, महादेवजवळील मुलनारच्या जंगलात पोलिस, सैन्य आणि सीआरपीएफच्या संयुक्त पथकाने घेराव घालून शोध मोहीम सुरू केली आहे. सुरक्षा दल संशयित ठिकाणी पोहोचताच लपून बसलेल्या दहशतवाद्यांनी गोळीबार केला, त्यानंतर सैन्यानेही प्रत्युत्तर दिले. चालू कारवाईवर लक्ष ठेवण्यासाठी लष्कर आणि जम्मू-काश्मीर पोलिसांचे वरिष्ठ अधिकारी घटनास्थळी पोहोचले आहेत. प्राथमिक माहितीनुसार, बंदी घातलेल्या लष्कर-ए-तैयबा (एलईटी) संघटनेशी संबंधित दहशतवाद्यांचा एक गट या भागात लपला आहे. ऑपरेशन संपल्यानंतर अधिक तपशील कळू शकेल असे सैन्याकडून स्पष्ट करण्यात आले.
