नवी दिल्ली : केंद्रीय अन्वेषण विभागाने हरियाणा पोलीस, परराष्ट्र मंत्रालय आणि गृह मंत्रालयाच्या सहकार्याने कुख्यात गुन्हेगार मैनपाल ढिल्ला उर्फ मैनपाल बादली उर्फ सोनू कुमार याचे कंबोडियाहून भारतात प्रत्यार्पण केले आहे. ढिल्ला हा हरियाणा पोलिसांना अनेक गुन्हेगारी प्रकरणांमध्ये हवा होता. सीबीआयच्या प्रवक्त्यांनी सांगितले की, मैनपाल ढिल्ला उर्फ मैनपाल बादली उर्फ सोनू कुमार हा एक कुख्यात गुन्हेगार आहे. जो हरियाणा पोलिसांना अनेक प्रकरणांमध्ये हवा होता. मैनपाल ढिल्लाला २ सप्टेंबर रोजी कंबोडियाहून भारतात आणण्यात आले. २००७ मध्ये त्याला खून, हत्येचा प्रयत्न, बेकायदेशीर शस्त्रांचा वापर आणि गुन्हेगारी कट रचण्याच्या आणखी एका प्रकरणात जन्मठेपेची शिक्षा सुनावण्यात आली होती.
याशिवाय त्याला इतर दोन प्रकरणांमध्येही दोषी ठरवण्यात आले आहे. २०१८ मध्ये हिसार मध्यवर्ती कारागृहातून सहा आठवड्यांच्या पॅरोलवर सुटल्यानंतर तो तुरुंगात परतला नाही आणि फरार झाला. हरियाणा पोलिसांच्या विनंतीवरून नोव्हेंबर २०२४ मध्ये इंटरपोलद्वारे सीबीआयने त्याच्याविरुद्ध रेड कॉर्नर नोटीस जारी केली होती. सीबीआयच्या तपासात असे दिसून आले की, ढिल्ला हा बनावट पासपोर्टवर सोनू कुमारच्या नावाने थायलंडहून कंबोडियाला गेला होता. सीबीआयने कंबोडियन अधिकाऱ्यांशी समन्वय साधला आणि मार्च २०२५ मध्ये त्याच्या अटकेची विनंती पाठवली.
कंबोडियाने जुलै २०२५ मध्ये त्याला अटक केली आणि नंतर त्याला भारताच्या स्वाधीन करण्याचा निर्णय घेतला. हरियाणा पोलिसांचे एक पथक कंबोडियाला गेले आणि २ सप्टेंबर रोजी ढिल्लाला भारतात परत घेऊन आले. भारतातील इंटरपोलसाठी राष्ट्रीय केंद्रीय ब्युरो म्हणून सीबीआय, इंटरपोल चॅनेलद्वारे मदतीसाठी भारतपोलद्वारे भारतातील सर्व कायदा अंमलबजावणी संस्थांशी समन्वय साधते. गेल्या काही वर्षांत इंटरपोल चॅनेलद्वारे समन्वय साधून १०० हून अधिक वॉन्टेड गुन्हेगारांना भारतात परत आणण्यात आले आहे.
