– तपासाअंती धमकी बनावट असल्याचे निष्पन्न
अहमदाबाद : गुजरातच्या मुख्यमंत्री कार्यालयाला आणि गांधीनगर येथील राज्य सचिवालयाला बॉम्बने उडवण्याची धमकी असलेला ईमेल मिळाला. परिसराची सखोल तपासणी केल्यानंतर ही धमकी बनावट असल्याचे निष्पन्न झाले. पोलीस उपअधीक्षक दिव्यप्रकाश गोहिल यांनी सांगितले की, राज्य सरकारच्या एका अधिकाऱ्याला १७ जुलै रोजी एक ईमेल मिळाला होता. ज्यामध्ये पाठवणाऱ्याने राज्याच्या राजधानीतील सीएमओ आणि सचिवालय परिसर उडवून देण्याची धमकी दिली होती.
मुख्यमंत्र्यांच्या सुरक्षा शाखेसह गांधीनगर पोलिसांनी त्याच दिवशी कारवाई केली. बॉम्ब पथक आणि इतर एजन्सींच्या मदतीने संपूर्ण परिसराची कसून तपासणी केली. यानंतर धमकी खोटी असल्याचे निष्पन्न झाले. शोध मोहिमेदरम्यान काहीही संशयास्पद आढळले नाही. अज्ञात संदेश पाठवणाऱ्याविरुद्ध भारतीय दंड संहिता आणि माहिती तंत्रज्ञान कायद्याच्या संबंधित कलमांखाली गुन्हा दाखल करण्यात आला आहे.अलिकडेच काही शाळा, कनिष्ठ न्यायालये आणि गुजरात उच्च न्यायालयालाही अशा प्रकारच्या बॉम्बस्फोटाच्या धमक्या मिळाल्या होत्या. चौकशीनंतर ते सर्व खोटे असल्याचे निष्पन्न झाले होते.
