नवी दिल्ली : भारतीय वायुसेना आपल्या आक्रमक क्षमतेत वाढ करण्यासाठी आणि ४२ लढाऊ विमानांच्या स्क्वॉड्रन्सच्या अनिवार्य मर्यादेपेक्षा अधिक ताफा उभारण्यासाठी पूर्णपणे सज्ज आहे. एका संरक्षण सूत्रानुसार, दक्षिण आशियातील परिस्थिती आणि भू-राजकीय अस्थिरता लक्षात घेता, वरिष्ठ अधिकारी आणि धोरणनिर्माते असा विश्वास व्यक्त करत आहेत की फक्त ४२ लढाऊ विमानांच्या स्क्वॉड्रन्सची संख्या पुरेशी नाही.
संरक्षण विभागातील एका वरिष्ठ अधिकाऱ्याने सांगितले, “दक्षिण आशियातील सध्याची स्थिती आणि वाढत्या तणावांच्या पार्श्वभूमीवर, ४२ स्क्वॉड्रन्सची संख्या कमी पडत आहे. अंतर्गत पुनरावलोकनातही हे स्पष्ट झाले आहे की ही संख्या अपुरी आहे, आणि भविष्यात ही संख्या आणखी वाढवण्याची गरज भासू शकते.” ही घडामोड ‘ऑपरेशन सिंदूर’च्या ४ महिन्यांनंतर घडली आहे. लष्कराच्या वरिष्ठ अधिकाऱ्यांनी ४ दिवस चाललेल्या संघर्षाला चीनने आपल्या छुप्या सहयोगी पाकिस्तानच्या माध्यमातून आपल्या सैनिकी उपकरणांची चाचणी घेण्यासाठी वापरलेले “प्रयोगशाळा” असल्याचे म्हटले आहे.
नवी दिल्लीतील एका कार्यक्रमात उप-लष्करप्रमुख लेफ्टनंट जनरल राहुल सिंह यांनी स्पष्टपणे सांगितले की, चीन वास्तविक संघर्षांचा उपयोग आपल्या शस्त्र प्रणालींची चाचणी घेण्यासाठी “थेट प्रयोगशाळा” म्हणून करत आहे, आणि ही बाब “अत्यंत गंभीरतेने घेणे गरजेचे” आहे. एकाचवेळी २ आघाड्यांवर एकत्रित युद्धाची शक्यता लक्षात घेता, ‘ऑपरेशन सिंदूर’नंतर भारतीय वायुसेनेतील लढाऊ विमानांची संख्या ४२ स्क्वॉड्रन्सच्या पलिकडे नेण्यावर सखोल चर्चा सुरू आहे.
सूत्रांनी दिलेल्या माहितीनुसार, स्क्वॉड्रन्सच्या संख्येत २५ ते ३५ टक्क्यांपर्यंत वाढ होण्याची शक्यता आहे. प्रत्येक स्क्वॉड्रनमध्ये सुमारे १६ ते १८ जेट विमाने असतात. या नव्या योजनेसाठी सुरक्षा विषयक मंत्रीमंडळ समितीकडूनही मंजुरी घ्यावी लागणार आहे. सध्या भारतीय वायुसेना लढाऊ विमानांच्या झपाट्याने घटणाऱ्या स्क्वॉड्रन्सच्या समस्येला सामोरे जात आहे.
