नवी दिल्ली : टाटा अॅडव्हान्स्ड सिस्टम्स लिमिटेड (टीएएसएल ) ने गुरुवारी (११ सप्टेंबर) भारतीय नौदलाच्या युद्धनौकेवर स्पॅनिश कंपनी इंद्रा यांच्या तंत्रज्ञान हस्तांतरणाच्या मदतीने बांधलेले पहिले स्वदेशी बनावटीचे ३D-ASR-Lanza-N कार्यान्वित केले. टीएएसएल ही अॅडव्हान्स्ड नेव्हल 3D एअर सर्व्हेलन्स रडार तयार करणारी भारताची पहिली कंपनी बनली आहे. ही उपलब्धी भारताच्या रक्षा आत्मनिर्भरतेच्या दिशेने एक महत्त्वाची पायरी मानली जात आहे. या रडार सिस्टीमचे स्थानिक पातळीवर असेंबली व इंटीग्रेशन करण्यात आले आहे.
हा रडार भारतीय नौदलाच्या युद्धनौकेवरील सर्व सिस्टम्ससह सुलभपणे एकात्मिक करण्यात आला आहे. रडार कमीशन करण्यापूर्वी त्याची समुद्रात व्यापक चाचणी घेण्यात आली, जिथे विविध नौदल व हवाई यंत्रणांचा वापर करून रडार क्रॉस-सेक्शनच्या वेगवेगळ्या श्रेणींमध्ये त्याच्या कामगिरीची कसोटी घेण्यात आली. टाटा अॅडव्हान्स्ड सिस्टीम्स लिमिटेडने यासंदर्भात एक निवेदन जारी केली, ज्यामध्ये कंपनीचे सीईओ आणि मॅनेजिंग डायरेक्टर सुकर्ण सिंग म्हणाले, “इंद्रा कंपनीसोबत आमचे सहकार्य भारतातील रडार निर्माण क्षमतेला बळकटी देण्याच्या आमच्या वचनबद्धतेचे प्रतीक आहे. ऑन-ग्राउंड कोऑर्डिनेशन, तांत्रिक कौशल्य आणि मजबूत पुरवठा साखळीच्या माध्यमातून आम्ही प्रगत संरक्षण तंत्रज्ञानासाठी एक सशक्त इकोसिस्टीम तयार करत आहोत.”
इंद्रा नेव्हल बिझनेस प्रमुख, अना बुएनिडा यांनी सांगितले,“ही प्रकल्प फक्त रडारची डिलिव्हरी आणि तैनातीपुरती मर्यादित नाही. यामुळे आम्हाला भारतातील बंगळुरूमध्ये रडार उत्पादन युनिट स्थापन करता आले, ज्यामुळे आम्ही ग्राहकांना अधिक जवळून आणि कार्यक्षम सेवा देऊ शकलो.” या प्रसिद्धीपत्रकात नमूद करण्यात आले आहे की, टाटा अॅडव्हान्स्ड सिस्टीम्स लिमिटेड (TASL) ही टाटा समूहाची एक कंपनी आहे जी भारतामध्ये हवाई आणि संरक्षण क्षेत्रातील प्रगत तंत्रज्ञानाची निर्मिती करते.
ही कंपनी विमानांचे फ्रेमवर्क आणि इंजिन्स तयार करते, सैन्यात वापरण्यात येणारी सुरक्षा उपकरणे आणि वाहने विकसित करते तसेच जगातील अनेक आघाडीच्या संरक्षण कंपन्यांसोबत भागीदारी करून, अनेकदा स्वतंत्रपणे अत्यावश्यक उपकरणे व तंत्रज्ञान पुरवते. ही घटना भारताच्या संरक्षण स्वावलंबन आणि “मेक इन इंडिया” उपक्रमाला चालना देणारी एक महत्त्वाची कामगिरी मानली जात आहे.
