नवी दिल्ली : राष्ट्रीय लोकशाही आघाडीने (एनडीए) महाराष्ट्राचे विद्यमान राज्यपाल सी.पी. राधाकृष्णन यांना उपराष्ट्रपती पदासाठी आपला उमेदवार जाहीर केले होते. हे दोन वेळा कोयंबतूरमधून लोकसभा खासदार राहिले आहेत. मात्र, तामिळनाडू भाजप अध्यक्ष म्हणून त्यांनी सक्रिय राजकारणात मोठी ओळख निर्माण केली. त्यानंतर त्यांना झारखंडचे राज्यपाल म्हणून नेमण्यात आले. असे मानले जाते की राधाकृष्णन यांची संघटन व प्रशासन या दोन्ही क्षेत्रांवर मजबूत पकड आहे. भारतीय जनता पक्षाचे ज्येष्ठ नेते आणि सध्या महाराष्ट्राचे राज्यपाल असलेले सी.पी. राधाकृष्णन यांनी उपराष्ट्रपती पदाची निवडणूक जिंकली आहे. त्यांना इलेक्टोरल कॉलेजमधून ४५२ मते मिळाली, तर विरोधी उमेदवार बी. सुदर्शन रेड्डी यांना ३०० मते मिळाली. राधाकृष्णन हे ४ दशकांहून अधिक काळापासून राजकारण आणि सामाजिक जीवनात सक्रिय आहेत आणि त्यांना तामिळनाडूच्या राजकारणातील एक सन्माननीय चेहरा मानले जाते.
सी.पी. राधाकृष्णन यांचा जन्म ४ मे १९५७ रोजी तामिळनाडूच्या तिरुप्पूर जिल्ह्यात झाला. त्यांनी बिझनेस ऍडमिनीस्ट्रेशनमध्ये पदवीचे शिक्षण घेतले. त्यांचा राजकीय प्रवास राष्ट्रीय स्वयंसेवक संघापासून सुरू झाला. ते १९७४ मध्ये भारतीय जनसंघाच्या राज्य कार्यकारिणीचे सदस्य बनले. ते ओबीसी समाजातील कोंगु वेल्लालर (गौंडर) या समाजातून येतात. त्यांच्या पत्नीचे नाव आर. सुमती आहे. त्यांना १९९६ मध्ये भाजप तामिळनाडूचे सचिव बनवण्यात आले. त्यानंतर १९९८ मध्ये पहिल्यांदा कोयंबतूरमधून लोकसभेसाठी निवडून आले, आणि १९९९ मध्ये पुन्हा निवडून आले.
लोकसभेत त्यांनी वस्त्रोद्योग (टेक्स्टाइल्स) संबंधी स्थायी समितीचे अध्यक्ष म्हणून काम केले आहे. तसेच, सार्वजनिक क्षेत्र उपक्रम (पीएसयू) समिती, वित्त सल्लागार समिती, आणि शेअर बाजार घोटाळ्याच्या चौकशीसाठी स्थापन केलेल्या विशेष समितीचे सदस्य म्हणूनही त्यांनी कार्य केले आहे.त्यांनी २००४ मध्ये संयुक्त राष्ट्र महासभेत भारतीय संसदीय प्रतिनिधीमंडळाचा भाग म्हणून भाषण दिले होते. ते तैवानला जाणाऱ्या पहिल्या भारतीय संसदीय प्रतिनिधीमंडळातही सहभागी होते.
सीपी राधाकृष्णन २००४ ते २००७ दरम्यान भाजप तामिळनाडू प्रदेश अध्यक्ष होते. या काळात त्यांनी १९ हजार किमी लांब रथयात्रा काढली जी ९३ दिवस चालली. या यात्रेद्वारे त्यांनी नद्या जोडणी, दहशतवाद निर्मूलन, समान नागरी कायदा, अस्पृश्यता निर्मूलन, आणि अंमली पदार्थांविरोधातील अभियान यांसारख्या मुद्द्यांना वाचा फोडली. या यात्रेमुळे त्यांचा राजकीय कद मोठ्या प्रमाणात वाढला.याशिवाय त्यांनी दोन पदयात्राही केल्या. २०१६ ते २०२० दरम्यान ते कोचीन येथील कोयर बोर्डाचे अध्यक्ष होते. त्यांच्या नेतृत्वाखाली कोयर निर्यात २५३२ कोटी रुपयांच्या उच्चतम स्तरावर पोहोचली. तसेच २०२० ते २०२२ या कालावधीत ते भाजपचे अखिल भारतीय प्रभारी होते आणि केरळचे प्रभारीपद त्यांच्याकडे सोपवण्यात आले होते.
त्यांची १८ फेब्रुवारी २०२३ रोजी झारखंडचे राज्यपाल म्हणून नेमणूक झाली. फक्त ४ महिन्यांत त्यांनी राज्यातील सर्व २४ जिल्ह्यांचा दौरा करून जनतेशी आणि प्रशासनाशी थेट संवाद साधला. त्यानंतर ३१ जुलै २०२४ रोजी त्यांची महाराष्ट्राचे राज्यपाल म्हणून बदली झाली. याशिवाय, २०२४ मध्ये त्यांची तेलंगणाचेही राज्यपाल म्हणून नियुक्ती झाली होती. एवढेच नव्हे तर, ते पुडुचेरीचे नायब राज्यपाल सुद्धा राहिले आहेत. सी.पी. राधाकृष्णन हे उत्कृष्ट खेळाडू देखील राहिले आहेत. कॉलेज स्तरावर ते टेबल टेनिसचे विजेते होते आणि लांब पल्ल्याचे धावपटू होते. त्यांना क्रिकेट आणि व्हॉलीबॉल यांचेही शौक आहे. ते अमेरिका, ब्रिटन, जर्मनी, जपान, चीन आणि अनेक युरोपीय देशांसह जगातील अनेक भागांत प्रवास केलेला आहे.
