नवी दिल्ली : नेपाळमधील जेन-झी चळवळीनंतर आता अंतरिम सरकार स्थापन झाले आहे. पंतप्रधान मोदींनी माजी मुख्य न्यायाधीश सुशीला कार्की यांचे अंतरिम पंतप्रधान झाल्याबद्दल अभिनंदन केले आहे. सोशल मीडिया प्लॅटफॉर्म एक्सवरील एका पोस्टमध्ये, पंतप्रधान मोदींनी सुशीला कार्की यांचे अभिनंदन केले आहे. पंतप्रधान मोदींनी सोशल मीडियावरील एक्सवर लिहिले आहे की, माननीय सुशीला कार्की जी यांनी नेपाळच्या अंतरिम सरकारच्या पंतप्रधानपदाची सूत्रे स्वीकारल्याबद्दल अभिनंदन. त्यांनी पुढे लिहिले की, भारत नेपाळच्या बंधू-भगिनींच्या शांती, प्रगती आणि समृद्धीसाठी पूर्णपणे वचनबद्ध आहे.
शुक्रवारी सुशील कार्की यांनी नेपाळचे अंतरिम पंतप्रधान म्हणून शपथ घेतली. नेपाळच्या राष्ट्रपतींनी त्यांना ही शपथ दिली. भारताच्या परराष्ट्र मंत्रालयाने जारी केलेल्या निवेदनात म्हटले आहे की, जवळचा शेजारी, लोकशाही देश आणि दीर्घकालीन विकास भागीदार म्हणून भारत दोन्ही देशांच्या नागरिकांसाठी आणि त्यांच्या कल्याणासाठी नेपाळसोबत जवळून काम करत राहील. नेपाळमध्ये ५ मार्च २०२६ रोजी सार्वत्रिक निवडणुका होणार आहेत. या निवडणुकीनंतर नेपाळला अंतरिम सरकारऐवजी नवीन सरकार मिळेल. नेपाळच्या अंतरिम पंतप्रधान म्हणून शपथ घेतल्यानंतर त्या देशाच्या पहिल्या महिला प्रमुख म्हणून उदयास आल्या आहेत. भ्रष्टाचारमुक्त देशाची इच्छा असलेल्या नागरिकांसाठी सुशीला कार्की या आशेचा किरण म्हणून उदयास आल्याचे मानले जात आहे.
