नवी दिल्ली : अंतराळवीर शुभांशू शुक्ला रविवारी आंतरराष्ट्रीय अंतराळ स्थानकाच्या ऐतिहासिक भेटीनंतर भारतात परतणार आहेत. मायदेशी परतल्यानंतर ते पंतप्रधान नरेंद्र मोदींना भेटतील. त्यानंतर ते त्यांचे मूळ गाव लखनऊला जातील. त्यानंतर ते २२-२३ ऑगस्ट रोजी राष्ट्रीय अंतराळ दिनाच्या समारंभात सहभागी होण्यासाठी दिल्लीला येतील. अमेरिकेतून निघताना शुभांशू शुक्ला यांनी इंस्टाग्रामवर विमानात बसलेला स्वतःचा हसरा फोटो पोस्ट केला आणि त्याच्या कॅप्शनमध्ये लिहिले की, अमेरिका सोडताना माझ्या हृदयात अनेक भावना भरून येत आहेत.
शुभांशु यांनी पोस्टमध्ये लिहिले की, मी भारतात परत येण्यासाठी विमानात बसताच माझ्या हृदयात अनेक प्रकारच्या भावना भरून येत आहेत. या मोहिमेदरम्यान गेल्या एक वर्षापासून माझे मित्र आणि कुटुंब असलेल्या त्या अद्भुत लोकांना मागे सोडून जाण्याचे मला दुःख आहे. मोहिमेनंतर पहिल्यांदाच माझे सर्व मित्र, कुटुंब आणि देशातील सर्व लोकांना भेटण्यास मी उत्सुक आहे. मला वाटते की, हेच जीवन आहे, सर्वकाही एकत्र आहे.
मोहिमेदरम्यान आणि नंतर सर्वांकडून अविश्वसनीय प्रेम आणि पाठिंबा मिळाल्याने, मी भारतात परत येण्यास आणि तुम्हा सर्वांसोबत माझे अनुभव शेअर करण्यास उत्सुक आहे. निरोप देणे कठीण आहेय पण आपण आयुष्यात पुढे जात राहिले पाहिजे. माझे कमांडर पेगी व्हिटसन प्रेमाने म्हणतात त्याप्रमाणे, अंतराळ उड्डाणात एकमेव स्थिर गोष्ट म्हणजे बदल. मला वाटते की हे जीवनाला देखील लागू होते.
शुभांशू शुक्ला यांनी लिहिले की, मला दिवसाच्या शेवटी वाटते की, ‘यु ही चला चल राही, जीवन गाडी है समय पहिया’. २५ जून रोजी अमेरिकेतून अ‍ॅक्सिओम-४ मोहिमेवर आयएसएसला जाण्यापूर्वी त्यांच्या प्लेलिस्टमध्ये असलेल्या बॉलीवूड चित्रपट स्वदेसमधील गाणे त्यांनी आठवले. शुभांशू शुक्ला अ‍ॅक्सिओम-४ खाजगी अंतराळ मोहिमेचा भाग होते. जे २५ जून रोजी फ्लोरिडाहून निघाले आणि २६ जून रोजी आंतरराष्ट्रीय अंतराळ स्थानकावर पोहोचले. १५ जुलै रोजी ते पृथ्वीवर परतले.
शुभांशु शुक्ला भारतात परतण्याबद्दल त्यांचे वडील शंभू दयाल शुक्ल म्हणाले की, आमचा मुलगा परत येत आहे. आम्हाला खूप आनंद आहे. आम्ही त्यांना भेटण्यासाठी दिल्लीला जात आहोत. ही संपूर्ण देशासाठी आणि आपल्यासाठी आनंदाची गोष्ट आहे. पंतप्रधान आणि सर्व मान्यवरांनी त्यांना आशीर्वाद दिले. मी सर्वांचे आभार मानते कारण त्यांच्या प्रार्थना आणि आशीर्वादामुळे त्यांचे ध्येय यशस्वी झाले. शुभांशू यांची बहीण शुची मिश्रा म्हणाली की, आम्ही खूप दिवसांपासून या दिवसाची वाट पाहत होतो आणि आता ते परत येत आहेत. त्यामुळे आम्ही खूप उत्साहित आहोत. आम्ही फक्त त्यांना भेटण्याची, त्यांना मिठी मारण्याची आणि देशासाठी इतके चांगले काम केल्याबद्दल त्यांचे अभिनंदन करण्याची वाट पाहत आहोत.
