मुंबई : वरळी येथील ६१ वा हीरक महोत्सवी महाराष्ट्र राज्य मराठी चित्रपट पुरस्कार प्रदान सोहळा कार्यक्रमात मुख्यमंत्री देवेंद्र फडणवीस यांचे भाषण सुरू असतानाच दोघांनी घोषणाबाजी केल्याचा प्रकार समोर आला आहे. ‘खालिद का शिवाजी’ नामक चित्रपटाला विरोध करत या घोषणाबाजी करण्यात आल्याचे समोर आले आहे. यानंतर पोलिसांनी दोघांना ताब्यात घेतले आहे. मुख्यमंत्री देवेंद्र फडणवीस हे वरळी येथे ६१ वा हीरक महोत्सवी महाराष्ट्र राज्य मराठी चित्रपट पुरस्कार प्रदान सोहळ्यात उपस्थित होते.
यावेळी देवेंद्र फडणवीस यांनी त्यांच्या भाषणाला सुरुवात केल्यानंतर प्रेक्षकांमध्ये बसलेल्या दोघांनी ‘खालिद का शिवाजी’ हा चित्रपट प्रदर्शित होऊ नये तसेच या चित्रपटाला विरोध करण्यासाठी ‘बंद करा बंद करा इतिहासाच्या विकृती बंद करा’, अशा घोषणा केल्या. घोषणाबाजी ऐकल्यावर मुख्यमंत्री देवेंद्र फडणवीस यांनी, तुमचे म्हणणे मांडले आहे, कार्यक्रम खराब करू नका, असे आवाहन केले. त्यानंतर पोलिसांनी घोषणाबाजी करणाऱ्यांना ताब्यात घेतले. त्यानंतर कार्यक्रम सुरळीत पार पडला. यावेळी कार्यक्रमात बोलताना देवेंद्र फडणवीस यांनी मराठी चित्रपट सृष्टीतील तसेच मराठी चित्रपटाला योगदान देणाऱ्यांचे कौतुक केले.
दरम्यान, ‘खालिद का शिवाजी’ या चित्रपटाला विरोध होताना दिसत आहे. हिंदू महासभेने देखील या चित्रपटाला विरोध केला आहे. रायगडावर मशीद नसताना देखील त्या ठिकाणी मशीद दाखवली जात आहे. हे इतिहासाचे विकृतीकरण सुरू आहे. त्यामुळे आमचा या चित्रपटाला विरोध असल्याचे घोषणाबाजी करणार्‍यांनी म्हटले आहे.
