जयपूर : केंद्रीय रेल्वे मंत्री अश्विनी वैष्णव यांचे वडील दाऊलाल वैष्णव यांचे आज(दि.८) जोधपूर येथील ऑल इंडिया इन्स्टिट्यूट ऑफ मेडिकल सायन्सेस (एम्स) येथे निधन झाले. ८१ वर्षीय दाऊलाल वैष्णव यांनी आज, सकाळी एम्स येथे अखेरचा श्वास घेतला. एम्स जोधपूरने एक प्रेस नोट जारी करून या दुःखद वृत्ताला दुजोरा दिला. दाऊलाल वैष्णव यांच्या निधनाने जोधपूर आणि पालीमध्ये शोककळा पसरली. आज जोधपूरमध्ये त्यांच्यावर अंत्यसंस्कार केले जातील. दाऊलाल वैष्णव काही काळापासून आजारी होते आणि त्यांच्यावर एम्स जोधपूर येथे उपचार सुरू होते. त्यांची प्रकृती गंभीर होती. वरिष्ठ डॉक्टरांच्या देखरेखीखाली त्यांच्यावर उपचार सुरू होते.
सोमवारी(दि.७) त्यांची प्रकृती आणखी बिघडली. त्यानंतर अश्विनी वैष्णव दिल्लीहून जोधपूरला पोहोचले. मंगळवारी(दि.८) सकाळी ११:५२ वाजता त्यांनी अखेरचा श्वास घेतला. एम्सने एका प्रेस नोटमध्ये म्हटले आहे की, अत्यंत खेदाने कळविण्यात येते की माननीय रेल्वेमंत्री अश्विनी वैष्णव जी यांचे वडील श्री दाऊलाल वैष्णव जी (८१ वर्षे) यांचे आज ८ जुलै २०२५ रोजी सकाळी ११:५२ वाजता एम्स जोधपूर येथे निधन झाले. दाऊलाल वैष्णव यांचे अंत्यसंस्कार आज(दि.८) जोधपूरला येथे होणार आहेत. अश्विनी वैष्णव दिल्लीहून जोधपूरला पोहोचले. तिथे ते त्यांच्या वडिलांच्या पार्थिवावर अंत्यसंस्कार करतील. दाऊलाल यांच्या निधनावर राजकारणी, सामाजिक कार्यकर्ते आणि स्थानिक नेत्यांनी शोक व्यक्त केला आहे.
दाऊलाल वैष्णव हे मूळचे राजस्थानातील पाली जिल्ह्यातील जीवनद कलान गावचे रहिवासी होते. १९६६ मध्ये ते त्यांच्या कुटुंबासह जोधपूरला आले आणि येथे कायमचे स्थायिक झाले. दाऊलाल हे इनकम टॅक्स प्रॅक्टिशनर होते. जोधपूरचे माजी आमदार कैलाश भन्साली यांच्यासोबत ते आयकर विभागात काम करत होते. त्यांच्या कठोर परिश्रम आणि समर्पणामुळे त्यांना स्थानिक समुदायात आदर मिळाला. दाऊलाल वैष्णव हे बैरागी ब्राह्मण समाजाचे होते आणि त्यांच्या कुटुंबात त्यांची पत्नी सरस्वती वैष्णव, मुले अश्विनी वैष्णव आणि आनंद वैष्णव यांचा समावेश आहे.
