सोलापूर : पंढरपूर येथील अलका अंकुश घाडगे (रा. आनंदनगर टाकळी रोड, पंढरपूर) यांनी श्रींच्या चरणी सुमारे ५ लाख किमतीची सोन्याची तुळशी माळ अर्पण केल्याची माहिती व्यवस्थापक मनोज श्रोत्री यांनी दिली.त्याबद्दल देणगीदार यांचा सत्कार मंदिर समितीच्या वतीने समितीचे व्यवस्थापक मनोज श्रोत्री यांच्या हस्ते श्रींची प्रतिमा व उपरणे देऊन करण्यात आला. यावेळी देणगीदार यांचे कुटुंब उपस्थित होते. या सोन्याच्या तुळशी माळेला ४३ पाने व ८८ व्हर्टिकल मनी आहेत. त्याचे अंदाजे वजन ६०.७८ ग्रॅम असून, ५ लक्ष १४ हजार इतकी किंमत होत आहे. सोने-चांदी देणगी स्वीकारण्यासाठी स्वतंत्र विभाग आहे. त्यासाठी अनुभवी व तज्ञ सराफाची नियुक्ती करण्यात आली आहे.सोने-चांदी देणगी देणार्‍या भाविकांना संगणकीय प्रणालीद्वारे पावती देण्यात येते. इच्छुक भाविकांनी मंदिर समितीच्या कार्यालयात संपर्क करावा, असे आवाहन मंदिर समितीच्या वतीने श्रोत्री यांनी केले.
