नवी दिल्ली : विरोध प्रदर्शन आणि वाढत्या तणावाच्या पार्श्वभूमीवर इराणने आपले हवाई क्षेत्र बंद केले आहे. इराणने गुरुवारी सकाळी कोणतेही स्पष्टीकरण न देता काही तासांसाठी व्यावसायिक उड्डाणांसाठी आपले हवाई क्षेत्र बंद केले आहे.यामुळे एअर इंडियाने आपल्या उड्डाणांच्या मार्गांमध्ये बदल केला असून प्रवाशांसाठी एक निवेदन आणि सल्लागार जारी केला आहे एअर इंडियाने एका निवेदनात सांगितले की, प्रवाशांच्या सुरक्षेचा विचार करून इराणऐवजी पर्यायी मार्गांचा वापर करण्यात येत आहे, त्यामुळे अनेक उड्डाणांचे मार्ग बदलण्यात आले आहेत. ज्या उड्डाणांचे मार्ग बदलणे शक्य झाले नाही, ती उड्डाणे रद्द करण्यात आली आहेत. त्यामुळे एअर इंडियाने प्रवाशांसाठी मार्गदर्शक सूचना जारी करत म्हटले आहे की, “प्रवाशांनी विमानतळावर जाण्यापूर्वी आमच्या वेबसाइटवर आपल्या उड्डाणाची स्थिती तपासावी, जेणेकरून त्यांना गैरसोय होणार नाही.”
इराणने गुरुवारी सकाळी कोणतेही स्पष्टीकरण न देता व्यावसायिक विमानांसाठी आपले हवाई क्षेत्र बंद ठेवण्याचा आदेश आणखी वाढवला. देशभर सुरू असलेल्या विरोध प्रदर्शनांवर तेहरानकडून होत असलेल्या कठोर कारवाईमुळे इराण आणि अमेरिका यांच्यातील तणाव कायम आहे. यापूर्वीच्या आदेशात हवाई क्षेत्र केवळ सुमारे दोन तासांसाठी बंद ठेवण्यात आले होते. आता जारी करण्यात आलेल्या नोटिसनुसार, हवाई क्षेत्र स्थानिक वेळेनुसार सकाळी ७.३० वाजेपर्यंत बंद राहण्याची शक्यता आहे. इराणी सरकारने हवाई क्षेत्र बंद करण्याच्या निर्णयामागचे कोणतेही कारण स्पष्ट केलेले नाही.
दरम्यान इराणी अधिकाऱ्यांनी बुधवारी संकेत दिले की देशव्यापी विरोध प्रदर्शनांदरम्यान ताब्यात घेतलेल्या संशयितांवर लवकरच सुनावणी होईल आणि त्यांना फाशीची शिक्षा दिली जाऊ शकते. तसेच, अमेरिकेने किंवा इस्राइलने इराणच्या अंतर्गत बाबींमध्ये हस्तक्षेप केल्यास त्याला प्रत्युत्तर दिले जाईल, असा इशाराही इराणने दिला आहे. अमेरिकेने कतारमधील एका प्रमुख अमेरिकी लष्करी तळावर तैनात असलेल्या काही सैनिकांना तेथून बाहेर जाण्याचा सल्ला दिल्यानंतर इराणकडून या धमक्या देण्यात आल्या. अमेरिकी राष्ट्राध्यक्ष डोनाल्ड ट्रम्प यांनी गेल्या २४ तासांत अनेक विधाने केली असली, तरी इराणविरोधात अमेरिकेची नेमकी कारवाई काय असेल, हे अद्याप स्पष्ट झालेले नाही.
