गांधीनगर : गुजरात दहशतवाद विरोधी पथकाने कर्नाटकातील बंगळुरू येथून ३० वर्षीय महिला शमा परवीन हिला दहशतवादी संघटना अल कायदाशी संबंधित असल्याच्या आरोपावरून अटक केली आहे.एटीएसचा दावा आहे की शमा परवीन ही एक्यूआयएस म्हणजेच अल-कायदा इन इंडियन सबकॉन्टीनेंटच्या ऑनलाइन दहशतवादी मॉड्यूलचा भाग होती. एटीएसने म्हटले आहे की, शमा परवीन मूळची झारखंडची आहे. या मॉड्यूलची ही पाचवी अटक आहे. यापूर्वी या मॉड्यूलच्या चार दहशतवाद्यांना अटक करण्यात आली आहे. गुजरातचे गृहमंत्री हर्ष संघवी यांनी शमाच्या अटकेला मोठे यश म्हटले आहे. माध्यमांशी बोलताना त्यांनी सांगितले की, महिलेचे पाकिस्तान कनेक्शन सापडले आहे. ती ऑनलाइन दहशतवादी मॉडेलवर काम करते.गुजरात एटीएसच्या मते, शमा परवीन ही या संपूर्ण मॉड्यूलची मुख्य सूत्रधार होती. आणि ती लोकांना कट्टरपंथी बनवत होती. आणि त्यांना दहशतवादी कारवायांसाठी तयार करत होती.
शमा अविवाहित आणि बेरोजगार आहे. ती सोशल मीडियाद्वारे अल कायदाच्या दहशतवादी मॉड्यूलचा प्रचार करत होती. तिला अटक केल्यानंतर गुजरात एटीएसने सांगितले की, शमा परवीन दोन फेसबुक आणि एका इंस्टाग्राम अकाउंटद्वारे सोशल मीडियावर जिहादचा प्रचार करत होती. तिच्या इन्स्टाग्राम अकाउंटवर १४ हजारांहून अधिक फॉलोअर्स आहेत. गुजरात एटीएसच्या मते, २२ जुलै रोजी अल कायदाशी संबंधित चार दहशतवाद्यांना अटक करण्यात आली. या दहशतवाद्यांच्या चौकशीदरम्यान शमा परवीनबद्दल माहिती समोर आली. त्यानंतर शमा परवीनला रडारवर ठेवण्यात आले. एटीएसने तिला बंगळुरू येथून अटक केली.
एटीएसचे डीआयजी सुनील जोशी म्हणाले की, आतापर्यंतच्या तपासात असे समोर आले आहे की. शमा परवीन जिहादी मानसिकता आणि गजवा-ए-हिंदचे अनेक व्हिडिओ सोशल मीडियावर पसरवून हिंसाचार पसरवत होती. ती काही वर्षांपासून बंगळुरूमध्ये तिच्या कुटुंबासह राहत होती. शमा परवीन व्हॉट्सअॅपद्वारे अनेक पाकिस्तानी अकाउंटशी संपर्कात होती. आता तिला कोणत्याही प्रकारचे निधी मिळत होता का किंवा तिच्याशी आणखी कोण जोडलेले आहे याची चौकशी केली जाईल. महिलेला अटक करून अहमदाबादला आणण्यात आले आहे. रिमांड घेऊन सविस्तर चौकशी केली जाईल.
गुजरात एटीएसच्या मते, शमा परवीन ही बंगळुरूतील आरटी नगर येथे राहत होती. ती इंस्टाग्राम अकाउंट स्ट्रेंजर्स नेशन०२ आणि फेसबुक पेज “स्ट्रेंजर्स ऑफ द नेशन” आणि “स्ट्रेंजर्स ऑफ द नेशन २” चालवत होती. अल-कायदा नेता मौलाना असीम उमरची जिहादी भाषणे पसरवण्यासाठी याचा वापर केला जात होता.
