पणजी : युद्धजन्य परिस्थितीत आर्थिक विकास होऊ शकत नाही. विकास आणि प्रगतीसाठी शांतता आवश्यक असल्याचे प्रतिपादन उपराष्ट्रपती जगदीप धनखड यांनी केले. ते आज,बुधवारी गोवा येथील मोरमुगाव बंदरात सौरऊर्जा प्रकल्पाच्या शुभारंभ प्रसंगी बोलत होते. यावेळी उपराष्ट्रपती धनखड म्हणाले की, आमचे ध्येय आहे की २०४७ पर्यंत भारत एक विकसित राष्ट्र, विकसित भारत बनावा. यासाठी दरडोई उत्पन्नात आठ पट वाढ आवश्यक आहे. हे तेव्हाच शक्य आहे जेव्हा आपल्या सीमेवर शांतता असेल. आजचा भारत जागतिक आर्थिक शक्ती आणि सागरी शक्ती म्हणून उदयास येत आहे, जो शांतता, शाश्वत विकास आणि प्रगतीसाठी वचनबद्ध आहे. आपण आधीच जगातील चौथी सर्वात मोठी अर्थव्यवस्था बनलो आहोत आणि इंडो-पॅसिफिक प्रदेशात एक आघाडीची शक्ती म्हणून उदयास येत आहोत. आपले समुद्र आज आपल्यासाठी पूर्वीपेक्षा जास्त महत्त्वाचे आहेत असे धनखड म्हणाले
वर्तमानात सुमारे ३०० कोटी रुपये खर्चाचे तीन प्रकल्प राष्ट्राला समर्पित करण्यात आले. केंद्र सरकारचे जलद गतीने काम पूर्ण करते. पंतप्रधानांना विकासाबद्दल ध्येयासक्ती आहे. ते जलद आणि मोठ्या प्रमाणात अंमलबजावणीवर विश्वास ठेवतात. वेगाने बदलणाऱ्या भू-राजकीय परिस्थितीत जिथे जागतिक व्यापार, धोरणात्मक अडथळे, सायबर धोके आणि आंतरराष्ट्रीय गुन्हे एकमेकांशी जोडलेले आहेत, तिथे समुद्रात नियम-आधारित व्यवस्था लागू करणे आव्हानात्मक होत आहे. महासागरांमध्ये नियम-आधारित सुव्यवस्था राखणे अत्यंत महत्वाचे आहे. भारताची सागरी सुरक्षा लवचिक, सक्रिय आणि भविष्यासाठी सज्ज असली पाहिजे. आपल्याला जहाजबांधणीला गती द्यावी लागेल आणि त्यात पुढाकार घ्यावा लागेल. आपण आपल्या मालवाहतुकीपैकी सुमारे ७० टक्के माल समुद्रमार्गे वाहून नेतो. आपली अर्थव्यवस्था आता झेप घेत नसून क्वांटम जंप घेत असल्याने मागणी आणखी वाढेल. आपल्याला यासाठी तयार राहावे लागेल.
यावेळी त्यांनी भारतीय तटरक्षक दलाच्या सेवेचे आणि समर्पणाचे कौतुक केले आणि म्हणाले की, तुम्ही आमचे सागरी रक्षक आहात, तुम्ही केवळ आमची सुरक्षाच नाही तर आमचा विवेक देखील आहात. आपले महासागर हे पृथ्वीचे फुफ्फुस आहेत, जे हवामानाचे नियमन करतात आणि जैवविविधतेला आधार देतात. तुम्ही लक्षद्वीपच्या प्रवाळ खडकांचे, सुंदरबनच्या खारफुटींचे, ऑलिव्ह रिडले कासवांचे प्रजनन स्थळांचे आणि सागरी जीवनाच्या स्थलांतर मार्गांचे रक्षण करता. तुम्ही समुद्राला बेकायदेशीर मासेमारी, प्रदूषण आणि विषारी कचऱ्यापासून सुरक्षित ठेवता असल्याचे त्यांनी सांगितले.
‘ऑपरेशन सिंदूर’चे कौतुक करताना उपराष्ट्रपती जगदीप धनखड म्हणाले, “२२ एप्रिल रोजी पहलगाममध्ये पाकिस्तानने दहशतवादी धाडस दाखवले तेव्हा भारताने अतिशय प्रभावी पद्धतीने प्रत्युत्तर दिले. मुरीदके आणि बहावलपूरमधील जैश-ए-मोहम्मद आणि लष्कर-ए-तोयबाच्या तळांना अचूकपणे लक्ष्य करण्यात आले, ज्यामुळे संपूर्ण जगाला स्पष्ट संदेश मिळाला. पंतप्रधान श्री नरेंद्र मोदी यांनी बिहारच्या मातीतून हा संदेश दिला – दहशतवाद आता सहन केला जाणार नाही. शिक्षा भोगावी लागेल आणि शिक्षा एक उदाहरण निर्माण करेल. हा हल्ला आंतरराष्ट्रीय सीमेपलीकडे खोलवर झाला, परंतु भारताच्या तत्वांनुसार, फक्त दहशतवाद्यांना लक्ष्य करण्यात आले. कोणीही पुरावे मागत नाही, कारण दहशतवाद्यांचे शवपेटी स्वतःच संपूर्ण जगासमोर पुरावा म्हणून आले – ते त्या देशाचे सैन्य, राजकारण आणि दहशतवादी स्वतः वाहून नेत होते. लोकशाहीच्या इतिहासातील ही एक अभूतपूर्व कामगिरी असल्याचे धनखड यांनी सांगितले.
