बंगळुरू : कर्नाटक सरकारने गुरुवारी कर्नाटक राज्य क्रिकेट संघाला (केएससीए) बंगळुरू येथील एम. चिन्नास्वामी क्रिकेट स्टेडियममध्ये आयपीएल सामने आयोजित करण्यास परवानगी देण्याचा निर्णय घेतला. उल्लेखनीय म्हणजे, गेल्या वर्षी जूनमध्ये रॉयल चॅलेंजर्स बेंगळुरू (आरसीबी)च्या पहिल्या विजेतेपदाच्या जल्लोषावेळी स्टेडियमबाहेर चेंगराचेंगरी झाली होती. या दुर्घटनेत ११ जणांचा मृत्यू झाला होता, तर ३० हून अधिक जण जखमी झाले होते. या घटनेनंतर स्टेडियममध्ये क्रिकेट सामने घेण्यास बंदी घालण्यात आली होती.
कर्नाटकचे कायदा आणि संसदीय कार्य मंत्री एच. के. पाटील यांनी पत्रकारांशी बोलताना सांगितले, “आज आम्ही आयपीएल सामने आयोजित करण्यास परवानगी देण्याचा निर्णय घेतला आहे. मात्र, मंत्रिमंडळाने गृह विभागाला विशेष आदेश जारी करून काही अटी ठरवण्यास सांगितले आहे. या अटी केएससीए आणि आरसीबीला पूर्ण कराव्या लागतील. संबंधित आदेश पुढील दोन दिवसांत जारी केला जाऊ शकतो.”
त्यांनी सांगितले की, अटींमध्ये स्टेडियमचे प्रवेशद्वार अधिक रुंद करणे याचाही समावेश आहे. मंत्र्यांनी असेही नमूद केले की, मंत्रिमंडळाच्या बैठकीत विशेष सखोल पुनरावलोकनावरही चर्चा झाली. काही ठिकाणी ते ज्या पद्धतीने आणि प्रक्रियेद्वारे लागू केले जात आहे, त्याबाबत विचारविनिमय करण्यात आला. मंत्रिमंडळाने कायदा आणि संसदीय कार्य विभागाला यासंदर्भात अभ्यास करून अहवाल सादर करण्याचे निर्देश दिले आहेत.
