तिरुवनंतपुरम : केरळमध्ये होणाऱ्या आगामी विधानसभा निवडणुकांपूर्वी पंतप्रधान नरेंद्र मोदी यांनी पक्ष कार्यकर्त्यांना एक अनोखी प्रेरणा दिली. भारतीय क्रिकेटपटू संजू सॅमसनच्या अलीकडील कामगिरीचे उदाहरण देत त्यांनी कठीण परिस्थितीत पुनरागमन कसे करावे, हे सॅमसनकडून शिकण्यासारखे असल्याचे सांगितले. शुक्रवारी पक्ष कार्यकर्त्यांना संबोधित करताना पंतप्रधानांनी टी-२० विश्वचषक २०२६ मधील सॅमसनच्या शानदार कामगिरीचे कौतुक केले. ते म्हणाले, “संजू सॅमसनने दाखवून दिले की टीकेच्या काळातही स्वतःला मानसिकदृष्ट्या मजबूत ठेवत योग्य वेळी उत्कृष्ट कामगिरी कशी करायची. जेव्हा संघाला त्याची सर्वाधिक गरज होती, तेव्हा त्याने आपले सर्वोत्तम प्रदर्शन केले.”
पंतप्रधानांनी यालाच खऱ्या खेळाडूची ओळख असल्याचे सांगत भाजप कार्यकर्त्यांना आवाहन केले की त्यांनीही निवडणुकांमध्ये याच जिद्दीने आणि आत्मविश्वासाने काम करावे. विशेषतः बूथ स्तरावरील सक्रियता वाढवणे, घराघर संपर्क अभियान अधिक वेगाने राबवणे आणि प्रत्येक निवडणूक उपक्रमात उत्साहाने सहभागी होण्याचे त्यांनी आवाहन केले.
