टोकियो : जपानच्या राजकारणात रविवारचा दिवस ऐतिहासिक ठरला. पंतप्रधान सनाए ताकाइची यांच्या नेतृत्वाखालील सत्ताधारी आघाडीने संसदीय निवडणुकांमध्ये ऐतिहासिक विजय मिळवला आहे. पंतप्रधान ताकाइची यांच्या पक्षाने दोन-तृतीयांश बहुमत मिळवले आहे. त्यांच्या या विजयाबद्दल भारताचे पंतप्रधान नरेंद्र मोदी यांनी त्यांचे अभिनंदन केले आहे. पंतप्रधान नरेंद्र मोदी यांनी ताकाइची यांचे अभिनंदन करताना म्हटले, “सनाए ताकाइची, प्रतिनिधी सभेच्या निवडणुकांमध्ये ऐतिहासिक विजय मिळवल्याबद्दल आपले मनःपूर्वक अभिनंदन. आपल्या कुशल नेतृत्वाखाली भारत आणि जपान यांची मैत्री नव्या उंचीवर नेली जाईल, असा मला विश्वास आहे.”
जपानमध्ये झालेल्या सार्वत्रिक निवडणुकीत सत्ताधारी लिबरल डेमोक्रॅटिक पार्टीने मोठा आणि ऐतिहासिक विजय मिळवला आहे. या विजयामुळे पंतप्रधान सनाए ताकाइची यांना आपल्या सरकारच्या धोरणांना पुढे नेण्यासाठी मजबूत जनादेश मिळाला आहे. माध्यमांच्या वृत्तानुसार, एलडीपीने हाऊस ऑफ रिप्रेझेंटेटिव्ह्सच्या ४६५ पैकी दोन-तृतीयांशपेक्षा अधिक जागा जिंकल्या आहेत. दोन-तृतीयांश बहुमताचा अर्थ असा की आता एलडीपी संविधानात बदल करण्यासारखे मोठे निर्णय घेऊ शकते.
याशिवाय, संसदेतल्या वरच्या सभागृहात म्हणजेच हाऊस ऑफ काउंसिलर्समध्ये एखाद्या कायद्याला मंजुरी मिळाली नाही, तरीही खालच्या सभागृहातील ताकदीच्या जोरावर सरकार तो कायदा मंजूर करून घेऊ शकते. विशेष म्हणजे, युद्धानंतरच्या जपानमध्ये प्रथमच एखाद्या पक्षाने इतके मोठे बहुमत मिळवले आहे. निवडणुकीपूर्वी एलडीपीकडे १९८ जागा होत्या, मात्र यावेळी पक्षाने भरीव वाढ नोंदवली आहे. या मोठ्या विजयाचे श्रेय मोठ्या प्रमाणावर पंतप्रधान सनाए ताकाइची यांच्या लोकप्रियतेला दिले जात आहे. ऑक्टोबरमध्ये पदभार स्वीकारल्यानंतरच त्यांची प्रतिमा एक मजबूत नेता म्हणून निर्माण झाली आहे.
