नवी दिल्ली : लोकसभेत सुरू असलेल्या गोंधळाच्या पार्श्वभूमीवर, विरोधी पक्षनेते राहुल गांधी यांनी मंगळवारी माजी लष्करप्रमुख जनरल मनोज मुकुंद नरवणे यांच्या कथित पुस्तक “फोर स्टार्स ऑफ डेस्टिनी” च्या प्रकाशंकावर खोटे बोलल्याचा आरोप केला आणि दावा केला की, हे पुस्तक विक्रीसाठी उपलब्ध आहे. संसद भवन संकुलात पत्रकारांशी बोलताना राहुल गांधींनी जनरल नरवणे यांची १५ डिसेंबर २०२३ रोजीची त्यांच्या मोबाईल फोनवरील पोस्ट दाखवली. ते म्हणाले की, ही जनरल नरवणे यांची आधीची पोस्ट होती ज्यामध्ये त्यांनी लिहिले होते, “नमस्कार मित्रांनो. माझे पुस्तक आता उपलब्ध आहे. केवळ या लिंकवर जा. वाचण्याचा आनंद घ्या. जय हिंद.”
राहुल म्हणाले, “प्रश्न असा आहे की, जनरल नरवणे खोटे बोलत आहेत की पेंग्विन प्रकाशन. पण मला माजी लष्करप्रमुखांवर विश्वास आहे; ते खोटे बोलत नाहीत.”ते म्हणाले की, पुस्तकात दिलेले काही संदर्भ सरकार आणि पंतप्रधानांसाठी गैरसोयीचे आहेत, त्यामुळे वाद निर्माण होत आहे. आता, कोण खरे बोलत आहे हे ठरवावे लागेल: प्रकाशक की माजी लष्करप्रमुख. विरोधी पक्षनेते राहुल गांधी म्हणाले की, जनरल नरवणे यांनी पुस्तकात लिहिलेल्या गोष्टी सरकार आणि पंतप्रधानांसाठी गैरसोयीच्या आहेत आणि म्हणूनच त्यावर बंदी घालण्याचे प्रयत्न सुरू आहेत. या पुस्तकाचे प्रकाशक पेंग्विन रँडम हाऊस इंडिया यांनी सोमवारी सांगितले की,जनरल नरवणे यांचे पुस्तक अद्याप प्रकाशित झालेले नाही आणि त्याच्या कोणत्याही प्रती, छापील असो वा डिजिटल, प्रकाशित, वितरित, विकल्या गेलेल्या किंवा जनतेला उपलब्ध करून दिलेल्या नाहीत.
राहुल गांधी ज्या पोस्टचा उल्लेख करत होते ती १५ डिसेंबर २०२३ रोजी जनरल नरवणे यांनी एक्स वर शेअर केली होती. त्यात त्यांनी पेंग्विन इंडियाच्या एक्स पोस्टचा स्क्रीनशॉट जोडला होता. त्यात पेंग्विन पब्लिशिंगने ई-कॉमर्स साइट Amazon ची लिंक शेअर केली होती, ज्यामध्ये लिहिले होते, “विजय दिवसाची तयारी करत असताना, आपल्या देशाच्या नायकांचा सन्मान करूया. भारताचे २८ वे लष्करप्रमुख म्हणून काम करणारे आणि अनेक दशके देशासाठी लढणारे मनोज नरवणे यांच्यापासून सुरुवात करूया. त्यांची कहाणी जाणून घेण्यासाठी, आताच फोर स्टार्स ऑफ डेस्टिनीची प्री-ऑर्डर करा.”
एक दिवस आधी, सोमवारी, दिल्ली पोलिसांनी एका निवेदनात म्हटले होते की, सोशल मीडिया आणि न्यूज प्लॅटफॉर्मवर माहिती समोर आली होती की “फोर स्टार्स ऑफ डेस्टिनी” या पुस्तकाची प्री-प्रिंट प्रत फिरत आहे. तपासात असे दिसून आले की, पेंग्विन रँडम हाऊस इंडियाने प्रकाशित केलेल्या पुस्तकाची पीडीएफ प्रत काही वेबसाइटवर उपलब्ध आहे आणि पुस्तकाचे मुखपृष्ठ काही ऑनलाइन प्लॅटफॉर्मवर विक्रीसाठी देखील प्रदर्शित केले गेले आहे. संबंधित अधिकाऱ्यांकडून प्रकाशन परवानगी अद्याप मिळालेली नाही. या कथित गळती आणि प्रकाशन नियमांचे उल्लंघन या प्रकरणाची चौकशी करण्यासाठी विशेष कक्षाकडे गुन्हा दाखल करण्यात आला आहे आणि तपास सुरू आहे.
