कोलकाता : केंद्रीय गृहमंत्री अमित शाह यांनी शनिवारी ममता बॅनर्जी यांच्या नेतृत्वाखालील तृणमूल काँग्रेस (टीएमसी) सरकारवर हल्लाबोल केला. त्यांनी आरोप केला की, तृणमूल सरकार घुसखोरांना संरक्षण देत आहे आणि भ्रष्टाचाराला संस्थात्मक स्वरूप देण्यात आले आहे. ते म्हणाले की, निवडणूक फायद्यासाठी सीमा सुरक्षा उपाययोजना जाणूनबुजून रोखल्या जात आहेत. पश्चिम बंगालच्या उत्तर चोवीस परगणा जिल्ह्यातील बराकपूर येथे शनिवारी भाजप कार्यकर्त्यांच्या मेळाव्याला संबोधित करताना अमित शाह यांनी दावा केला की तृणमूल काँग्रेस सरकारचा आगामी विधानसभा निवडणुकीत पराभव निश्चित आहे. ते म्हणाले की, पश्चिम बंगालमध्ये भाजप सरकारची स्थापना केवळ राज्यासाठीच नाही तर संपूर्ण देशाच्या राष्ट्रीय सुरक्षेसाठी आवश्यक आहे.
अमित शाह म्हणाले की, पश्चिम बंगालमधील घुसखोरी ही संपूर्ण देशासाठी एक मोठी सुरक्षा समस्या बनली आहे. त्यांनी आरोप केला की, न्यायालयाच्या आदेशानंतरही तृणमूल काँग्रेस सरकार सीमा कुंपण बांधण्यासाठी बीएसएफला जमीन देत नाही कारण घुसखोर त्यांची मतपेढी आहेत. त्यांनी असा दावा केला की. राज्य प्रशासन आणि पोलिस बेकायदेशीर स्थलांतरितांना रोखत नाहीत. बनावट कागदपत्रे तयार करून त्यांना देशाच्या वेगवेगळ्या भागात पाठवले जात आहे.कोलकात्याच्या आनंदपूर परिसरातील मोमो कारखान्यात अलिकडेच लागलेल्या आगीचा संदर्भ देत गृहमंत्र्यांनी सांगितले की, हा अपघात नाही तर ममता बॅनर्जी सरकारच्या भ्रष्टाचाराचा परिणाम आहे. त्यांनी प्रश्न केला की कारखानदारांना अद्याप अटक का करण्यात आली नाही. हे सत्ताधारी पक्षाशी असलेल्या त्यांच्या जवळीकतेमुळे होते का? त्यांनी विचारले की बंगालमधील प्रशासन पूर्णपणे कोसळले आहे का.
अमित शाह यांनी तृणमूल काँग्रेसवर मातुआ आणि नमशुद्र समुदायांना धमकावण्याचा आरोपही केला. त्यांनी या समुदायांना खात्री दिली की त्यांना घाबरण्याची गरज नाही आणि कोणीही त्यांच्या मतांना हात लावू शकत नाही.भ्रष्टाचाराच्या मुद्द्यावर त्यांनी ममता बॅनर्जी गंभीर असतील तर विधानसभा निवडणुकीत कलंकित मंत्र्यांना तिकिटे देऊ नका असे आव्हान दिले. त्यांनी असाही दावा केला की भाजप ५० टक्क्यांहून अधिक मते जिंकेल आणि प्रचंड मतांनी सरकार स्थापन करेल.गृहमंत्र्यांनी संसदेत “वंदे मातरम्” या विषयावर चर्चेला विरोध करत तृणमूल काँग्रेसवर आरोप केला. ते म्हणाले की, घुसखोरांना खुश करण्यासाठी हे केले जात आहे. त्यांनी जनतेला टीएमसी राजवट उलथवून बंगालमध्ये देशभक्त आणि राष्ट्रवादींचे सरकार स्थापन करण्याचे आवाहन केले.
