कोलंबो : श्रीलंकेत चक्रवात दित्वामुळे आलेल्या पुर आणि भूस्खलनामुळे १३२ जणांचा मृत्यू झाला आहे, १७६ जण बेपत्ता आहेत आणि ७८ हजार लोक विस्थापित झाले आहेत. अशा परिस्थितीत पाकिस्तानने श्रीलंकेला मानवीय मदत पाठवली, पण ती आंतरराष्ट्रीय वादाचे कारण ठरली. पाकिस्तानने पाठवलेल्या अन्नसामग्री आणि औषधांवर एक्सपायरी डेट २०२४ लिहिलेली होती. श्रीलंकन अधिकाऱ्यांनी सांगितले की पाकिस्तानकडून आलेल्या औषधं, फूड पॅकेट्स आणि पूरग्रस्तांसाठी आवश्यक वस्तूंमध्ये अनेक आयटम एक्सपायर झालेले होते. श्रीलंकेच्या आपत्ती व्यवस्थापन आणि परराष्ट्र विभागांनी याला गंभीर चिंता मानत पाकिस्तानकडून औपचारिक स्पष्टीकरण मागितले आहे.
२८ नोव्हेंबरला चक्रवात दित्वाने श्रीलंकेत भयंकर कहर केला होता. या आपत्तीत “बंधुत्व” दाखवण्याचा दावा करत पाकिस्तानने तातडीने मदत घोषित केली आणि २९ नोव्हेंबरला पाकिस्तानी नौदलाचे जहाज अनेक टन मदत साहित्य घेऊन कोलंबो बंदरात पोहोचले. यात फूड पॅकेट्स, औषधे, फर्स्ट एड किट, सुका राशन, तंबू आणि इतर आवश्यक सामग्री होती. ३० नोव्हेंबरला श्रीलंकेतल्या पाकिस्तान दूतावासाने एक पोस्ट करून लिहिले, “पाकिस्तानकडून पाठवलेले मदत साहित्य श्रीलंकेतील पूरग्रस्त बांधवांपर्यंत पोहोचले. ही आमच्या अटूट एकजुटतेची निशाणी आहे. पाकिस्तान सदैव श्रीलंकेसोबत उभा आहे.” परंतु जेव्हा श्रीलंकन अधिकाऱ्यांनी सामग्रीची तपासणी केली तेव्हा अनेक पॅकेट्सवर २०२४ ची एक्सपायरी डेट आढळली. औषधं आणि फूड आयटम्स खराब झालेले होते. वाद उफाळल्यावर पाकिस्तान दूतावासानेती पोस्ट डिलीट केली.
मात्र, श्रीलंकेच्या आपत्ती व्यवस्थापन आणि परराष्ट्र विभागांनी याबाबत तीव्र नाराजी व्यक्त केली आहे. अधिकाऱ्यांनी इस्लामाबादशी औपचारिक आणि अनौपचारिक दोन्ही मार्गांनी विरोध नोंदवला. त्यांचे म्हणणे आहे की देश इतक्या भीषण संकटातून जात असताना पाकिस्तानकडून एक्सपायर मदत पाठवणे त्यांच्या प्रामाणिकपणावर आणि क्षमतेवर प्रश्न निर्माण करते.दुसरीकडे भारताने पाकिस्तानला श्रीलंकेसाठी मदत सामग्री नेण्यासाठी भारतीय हवाई-क्षेत्र वापरण्याची परवानगी दिली आहे. ‘ऑपरेशन सिंदूर’नंतर हे दोन्ही देशांमधील महत्त्वाचे घडामोडी मानले जातात. आधी पाकिस्तानी मीडियाने दावा केला होता की भारताने त्यांच्या विमानांना एअरस्पेस नाकारला; परंतु भारतीय अधिकाऱ्यांनी स्पष्ट केले की पाकिस्तानची विनंती काही तासांतच मंजूर करण्यात आली.
