मुंबई : सध्या मराठी Zee 5 वर स्ट्रीम होत असलेल्या ‘कोण यशवंत पानसरे?’ या मालिकेने आपल्या उत्कंठावर्धक कोर्टरूम ड्रामा, सखोल कथानक आणि न्याय, पश्चात्तापातून मिळणारी मुक्ती तसेच कायदेशीर व्यवस्थेतील गुंतागुंतीचे पैलू उलगडणाऱ्या कथेमुळे प्रेक्षकांचे लक्ष वेधून घेतले आहे. भरत जाधव यांच्या प्रमुख भूमिकेने सजलेल्या या मालिकेत प्रभावी अभिनय आणि न्याय मिळवण्याच्या प्रक्रियेतील वास्तवावर विचार करायला लावणारे प्रश्न पाहायला मिळतात. कायदेशीर लढाया आणि त्यात अडकलेल्या व्यक्तींच्या कथा मांडताना, वकिली व्यवसायासोबत येणाऱ्या जबाबदारीवरही ही मालिका प्रकाश टाकते. कारण वकिलाचा प्रत्येक युक्तिवाद, निर्णय आणि पुरावा एखाद्याच्या आयुष्यावर दूरगामी परिणाम करू शकतो.
एक कलाकार म्हणून, विविध क्षेत्रांतील आणि व्यवसायांतील व्यक्तींच्या भूमिका साकारण्याची संधी मिळणे हा अभिनयातील सर्वात आनंददायी अनुभव असतो. शिवानी रांगोळे यांच्यासाठी *‘कोण यशवंत पानसरे?’* या मालिकेत जान्हवी या तरुण लॉ इंटर्नची भूमिका साकारणे हा पडद्यावर यापूर्वी कधीही न साकारलेल्या व्यवसायाचा अनुभव घेण्याची संधी होती. या भूमिकेला त्यांच्यासाठी एक खास वैयक्तिक महत्त्वही होते, कारण त्यांचे सासरे वकील आहेत. त्यामुळे वकिलाची भूमिका साकारण्याचा त्यांचा अनुभव अधिकच विशेष ठरला.
याबद्दल सांगताना शिवानी रांगोळे म्हणाल्या, “मी पहिल्यांदा वकिलाचा कोट घातला, तेव्हा त्याचा एक फोटो काढून माझ्या कुटुंबीयांना पाठवला, कारण माझे सासरे वकील आहेत. मला ही भूमिका मिळाली तेव्हा मी खूप आनंदी होते आणि सर्वात आधी माझ्या मनात विचार आला की मला वकिलाच्या भूमिकेत पाहून त्यांना किती आनंद होईल. मात्र, त्याच वेळी मनात थोडी भीतीही होती, कारण या व्यक्तिरेखेसोबत येणाऱ्या जबाबदारीची मला जाणीव झाली होती.
शाळेतील नाटकासाठी पहिल्यांदा रंगमंचावर उभी राहिले होते, तेव्हाही मला असाच थरार आणि भीती जाणवली होती. वकिलाचा कोट घालून न्यायाधीशांसमोर उभे राहिल्यावर त्याच भावना पुन्हा जाग्या झाल्या. तेव्हा मला जाणवले की वकिलाच्या खांद्यावर किती मोठी जबाबदारी असते, कारण त्यांच्या युक्तिवादांवर आणि निर्णयांवर एखाद्याचे आयुष्य आणि भविष्य अवलंबून असू शकते. एखादे नाट्यप्रयोग सुरू होण्यापूर्वी मला जी नेहमीची धाकधूक जाणवते, तसाच अनुभव या मालिकेतील एखाद्या दृश्याच्या आधीही आला. इतर कलाकार ज्या तीव्रतेने आणि गांभीर्याने आपापली दृश्ये साकारत होते, ते पाहूनही माझ्या मनावर खोलवर छाप पडली.”
‘कोण यशवंत पानसरे?’ आता केवळ मराठी Zee 5 वर स्ट्रीम होत आहे.
