नवी दिल्ली : पंतप्रधान नरेंद्र मोदी यांनी नॉर्वे बुद्धिबळ २०२६ चे विजेतेपद पटकावल्याबद्दल भारतीय ग्रँडमास्टर आर. प्रज्ञानंदचे अभिनंदन केले आहे. ही प्रतिष्ठित स्पर्धा जिंकणारा प्रज्ञानंद हा पहिला भारतीय बुद्धिबळपटू ठरला आहे. पंतप्रधानांनी सोशल मीडियावर लिहिले, “या उल्लेखनीय कामगिरीबद्दल प्रज्ञानंदचे अभिनंदन. ही खरोखरच एक अविश्वसनीय कामगिरी आहे, जी त्याची सातत्यपूर्ण उत्कृष्टता दर्शवते. त्याच्या पुढील वाटचालीस माझ्या शुभेच्छा.”
केंद्रीय युवक व्यवहार आणि क्रीडा मंत्री, मनसुख मांडविया यांनी प्रतिष्ठित नॉर्वे बुद्धिबळ स्पर्धा जिंकल्याबद्दल भारतीय ग्रँडमास्टर आर. प्रज्ञानंदचे अभिनंदन केले. मांडविया यांनी या ऐतिहासिक कामगिरीची प्रशंसा केली आणि सांगितले की, संपूर्ण देश हा अभिमानाचा क्षण साजरा करत आहे. त्यांनी सोशल मीडियावर लिहिले, “भारतीय बुद्धिबळासाठी हा एक ऐतिहासिक दिवस आहे. नॉर्वे बुद्धिबळ स्पर्धा जिंकणारे पहिले भारतीय ठरल्याबद्दल ग्रँडमास्टर आर. प्रज्ञानंदचे मनःपूर्वक अभिनंदन. संपूर्ण देशाला तुमचा अभिमान आहे.”
चेन्नईच्या २० वर्षीय ग्रँडमास्टर प्रज्ञानंदने नॉर्वेच्या स्टावांगर येथे झालेल्या स्पर्धेच्या १०व्या आणि अंतिम फेरीत जर्मनीच्या व्हिन्सेंट केमरचा पराभव करून विजेतेपद पटकावले. या विजयामुळे त्याने एकूण १८ गुण मिळवले आणि अमेरिकन ग्रँडमास्टर वेस्ली सो याला मागे टाकत तो विजेता ठरला.
