कोलकाता : पश्चिम बंगालच्या माजी मुख्यमंत्री आणि तृणमूल काँग्रेसच्या प्रमुख ममता बॅनर्जी तसेच त्यांच्या पक्षाच्या विद्यार्थी संघटनेच्या आयोजकांविरोधात हेस्टिंग्स पोलीस ठाण्यात गुन्हा दाखल करण्यात आला आहे. तृणमूल विद्यार्थी परिषदेच्या स्थापना दिनानिमित्त 28 ऑगस्ट रोजी आयोजित कार्यक्रमादरम्यान कलकत्ता उच्च न्यायालयाच्या आदेशाचे उल्लंघन केल्याप्रकरणी हा गुन्हा दाखल करण्यात आला आहे.
पोलिसांकडे दाखल करण्यात आलेल्या तक्रारीनुसार, कार्यक्रमाला उपस्थित असलेल्या समर्थकांनी कथितरित्या बॅरिकेड्स हटवले आणि पोलिस कर्मचाऱ्यांशी धक्काबुक्की केली. याशिवाय कॅथेड्रल रोडवरील वाहतुकीलाही अडथळा निर्माण झाल्याचा आरोप करण्यात आला आहे. न्यायालयाने निश्चित केलेली वेळ संपल्यानंतरही कार्यक्रम सुरू ठेवण्यात आल्याचे तक्रारीत नमूद करण्यात आले आहे.या प्रकरणी भारतीय न्याय संहितेच्या कलम ६१(२), २२३, १२५(अ), १३२ आणि २८५ अंतर्गत गुन्हा दाखल करण्यात आला आहे.
