दिल्लीच्या मंदिर मार्ग पोलीस ठाण्यात गुन्हा दाखल
नवी दिल्ली : कॉकरोच जनता पार्टीचे (सीजेपी) सहसंयोजक सौरभ दास आणि आशुतोष रांका यांना तुरुंगात पाठवण्याचा आदेश देणाऱ्या विशेष कार्यकारी दंडाधिकाऱ्याला धमकीचा संदेश मिळाल्याची घटना समोर आली आहे. या प्रकरणी संबंधित दंडाधिकाऱ्यांनी दिल्लीतील मंदिर मार्ग पोलीस ठाण्यात अज्ञात व्यक्तीविरोधात तक्रार दाखल केली आहे. धमकीचा संदेश मिळाल्यानंतर पोलिसांनी या प्रकरणाची गंभीर दखल घेत तपास सुरू केला आहे. हा संदेश नेमका कोणी पाठवला, तसेच त्यामागील उद्देश काय होता, याचा शोध मंदिर मार्ग पोलीस घेत आहेत.
जंतर-मंतरवरील प्रवेश प्रकरणातून अटक
दिल्लीमध्ये कडक नाकेबंदी असतानाही सीजेपीचे सहसंयोजक सौरभ दास, आशुतोष रांका आणि अजिंक्य शिंदे यांनी प्रतिबंधित क्षेत्र असलेल्या जंतर-मंतर परिसरात प्रवेश केल्याचा आरोप आहे. या प्रकरणी दिल्ली पोलिसांनी तिघांविरोधात भारतीय न्याय संहितेच्या (BNS) विविध कलमांनुसार गुन्हा दाखल करून त्यांना अटक केली होती. तिन्ही आरोपींना गेल्या बुधवारी सकाळी १०.३० वाजता संसद मार्ग परिसरातील एसीएम न्यायालयात हजर करण्यात आले होते. यावेळी यापूर्वी घालून दिलेल्या जामिनाच्या अटींचे उल्लंघन केल्याच्या कारणावरून न्यायालयाने सौरभ दास आणि आशुतोष रांका यांना पाच दिवसांसाठी तिहार तुरुंगात पाठवण्याचे आदेश दिले होते.
या कारवाईनंतर संबंधित विशेष कार्यकारी दंडाधिकाऱ्याला धमकीचा संदेश मिळाल्याने प्रकरणाला नवे वळण मिळाले आहे. दंडाधिकाऱ्यांच्या तक्रारीनंतर मंदिर मार्ग पोलिसांनी अज्ञात व्यक्तीविरोधात गुन्हा नोंदवून तपास सुरू केला आहे. धमकीचा संदेश कोणत्या माध्यमातून पाठवण्यात आला, त्याचा स्रोत काय आहे आणि या प्रकरणामागे कोणाचा सहभाग आहे, याची माहिती पोलीस गोळा करत आहेत.या तपासातून धमकी देणाऱ्या व्यक्तीची ओळख स्पष्ट होण्याची अपेक्षा आहे. दरम्यान, या प्रकरणातील पुढील घडामोडींकडे लक्ष लागले आहे.
