नवी दिल्ली : भारतीय जनता पक्षाचे ज्येष्ठ नेते जॉर्ज कुरियन यांनी मंगळवारी केंद्रीय राज्यमंत्रीपदाचा राजीनामा दिला. ते अल्पसंख्याक व्यवहार मंत्रालय तसेच मत्स्यव्यवसाय, पशुसंवर्धन आणि दुग्धव्यवसाय मंत्रालयांमध्ये राज्यमंत्री म्हणून कार्यरत होते. राज्यसभेचे सदस्य म्हणून त्यांचा सहा वर्षांचा कार्यकाळ पूर्ण झाल्यामुळे त्यांना हे पद सोडावे लागले.
राष्ट्रपती भवनाकडून जारी करण्यात आलेल्या निवेदनानुसार, पंतप्रधान नरेंद्र मोदी यांच्या सल्ल्यानुसार राष्ट्रपतींनी जॉर्ज कुरियन यांचा राजीनामा तात्काळ प्रभावाने स्वीकारला आहे.जॉर्ज कुरियन हे मूळचे केरळमधील कोट्टायम जिल्ह्यातील रहिवासी आहेत. मात्र, ते मध्य प्रदेशमधून राज्यसभेवर निवडून गेले होते. ६५ वर्षीय जॉर्ज कुरियन हे ऑगस्ट २०२४ पासून पंतप्रधान नरेंद्र मोदी यांच्या तिसऱ्या कार्यकाळातील मंत्रिमंडळाचा भाग होते. भाजपच्या स्थापनेपासून म्हणजेच १९८० पासून पक्षाशी जोडले गेलेल्या अनुभवी आणि जुन्या नेत्यांमध्ये त्यांची गणना होते. राजकारणातील सक्रिय भूमिकेसोबतच त्यांनी भारताच्या सर्वोच्च न्यायालयात वकील म्हणूनही काम केले आहे.
राज्यसभेचा कार्यकाळ संपल्यानंतर त्यांना पुन्हा उमेदवारी देण्यात आली नव्हती. केरळ विधानसभा निवडणुकांमध्ये पक्षाला अपेक्षित यश मिळाले नसल्यामुळे त्यांना पुन्हा संधी मिळाली नसल्याचे मानले जात आहे. जॉर्ज कुरियन यांचा जन्म २० सप्टेंबर १९६० रोजी केरळमधील कोट्टायम जिल्ह्यात झाला. आपल्या गावीच शालेय शिक्षण पूर्ण केल्यानंतर त्यांनी कायद्यात पदवी आणि पदव्युत्तर शिक्षण घेतले.
