नैरोबी : मध्य केनियातील साम्बुरू काउंटीमध्ये बुधवारी पर्यटकांना घेऊन जाणारे एक हेलिकॉप्टर कोसळले. या दुर्घटनेत हेलिकॉप्टरमधील सर्व सात जणांचा मृत्यू झाला. मृतांमध्ये इक्वाडोरच्या राष्ट्रीय गुप्तचर केंद्राचे प्रमुख मिशेल सेन्सी-कोंटुगी, त्यांच्या पत्नी आणि पाच अमेरिकन नागरिकांचा समावेश आहे. केनिया नागरी विमान वाहतूक प्राधिकरणाच्या (केसीएए) माहितीनुसार, ही दुर्घटना राजधानी नैरोबीच्या उत्तरेस असलेल्या साम्बुरू काउंटीमध्ये झाली. स्थानिक वेळेनुसार सकाळी 9 वाजून 13 मिनिटांनी हा अपघात झाला. हेलिकॉप्टर लोइसाबा वन्यजीव अभयारण्यातून निघाले होते. केनिया रेड क्रॉसने दुपारी ‘एक्स’वर शेअर केलेल्या छायाचित्रांमध्ये दुर्घटनास्थळ आगीच्या ज्वाळांनी वेढलेले दिसत होते.
दुर्गम आणि खडतर भूप्रदेशामुळे बचावकार्याला अडथळे येत असल्याचे रेड क्रॉसने सांगितले.विमान दुर्घटना तपास विभागाचे (AAID) संचालक फ्रेडरिक काबुंगे यांच्या माहितीनुसार, हेलिकॉप्टरमध्ये एक पायलट आणि सहा प्रवासी होते. या दुर्घटनेत एकही व्यक्ती वाचली नाही. साम्बुरू काउंटीचे पोलीस प्रमुख डेव्हिड नकोरोई यांनी सांगितले, “अंधार आणि दुर्घटनास्थळावरील गुंतागुंतीच्या परिस्थितीमुळे बचाव अभियान उद्यापर्यंत स्थगित करण्यात आले आहे.” अमेरिकेच्या परराष्ट्र विभागाच्या एका प्रवक्त्याने सांगितले की, या दुर्घटनेत पाच अमेरिकन नागरिकांचा मृत्यू झाला आहे. मात्र, त्यांच्या ओळखीबाबत कोणतीही माहिती देण्यात आलेली नाही.
दरम्यान, स्पॅनिश भाषेतील वृत्तवाहिनीने फ्लोरिडामध्ये कार्यरत असलेले तिचे वरिष्ठ व्यवस्थापक जोस अल्बर्टो सुआरेझ यांचा या दुर्घटनेत मृत्यू झाल्याचे जाहीर केले.
इक्वाडोरचे परिवहन मंत्री रॉबर्टो लुके यांनी राष्ट्रीय गुप्तचर केंद्राचे प्रमुख मिशेल सेन्सी-कोंटुगी आणि त्यांच्या पत्नीचाही मृतांमध्ये समावेश असल्याचे सांगितले. लुके यांनी ‘एक्स’वर लिहिले, “आज मिशेल आणि स्टेफनी आपल्याला खूप लवकर सोडून गेले. त्यांच्या कुटुंबीयांचा, विशेषतः त्यांच्या मुलांचा आणि पालकांचा विचार मनात येत आहे.” उत्तर केनियामध्ये साम्बुरू हे अतिशय सुंदर आणि लोकप्रिय पर्यटनस्थळ आहे. येथे समुद्रसपाटीपासून सुमारे 2,000 मीटर (6,560 फूट) उंचीवर एक पर्वत आहे. हे ठिकाण विशेषतः ट्रेकिंग आणि हायकिंगसाठी प्रसिद्ध आहे. पर्यटकांना आकाशातून परिसराचे विहंगम दृश्य दाखवण्यासाठी येथे काही पर्यटन कंपन्या हेलिकॉप्टर सफारी आणि हवाई सहलींचे आयोजन करतात.
