इस्लामाबाद : पीटीआयचे संस्थापक आणि पाकिस्तानचे माजी पंतप्रधान इमरान खान यांची शिफा इंटरनॅशनल रुग्णालयात सहा तज्ज्ञ डॉक्टरांच्या पथकाने वैद्यकीय तपासणी केली. तपासणीनंतर डॉक्टरांनी त्यांना रुग्णालयात दाखल ठेवण्याची तातडीची गरज नसल्याचे सांगितले आणि त्यांना कोठडीत ठेवणे सुरक्षित असल्याचे स्पष्ट केले. त्यानंतर इमरान खान यांना पुन्हा अदियाला तुरुंगात पाठवण्यात आले.पाकिस्तानी माध्यमांच्या वृत्तानुसार, सर्वोच्च न्यायालयाने इमरान खान यांच्या प्रकृतीचा विचार करून त्यांना वैद्यकीय तपासणी आणि उपचारांसाठी रुग्णालयात हलवण्याचे आदेश दिले होते. न्यायालयाने त्यांना दोन दिवसांच्या आत कोणत्यातरी वैद्यकीय संस्थेत हलवण्याचे निर्देश दिले होते. या निर्णयाविरोधात सरकारने पुनर्विचार याचिका दाखल केली होती. मात्र, गुरुवारी सकाळी सर्वोच्च न्यायालयाच्या रजिस्ट्रार कार्यालयाने काही आक्षेप नोंदवत ही याचिका परत पाठवली.
रुग्णालयात पोहोचल्यानंतर सहा तज्ज्ञ डॉक्टरांच्या पथकाने इमरान खान यांची सविस्तर वैद्यकीय तपासणी केली. तपासणी पूर्ण झाल्यानंतर डॉक्टरांनी त्यांना रुग्णालयात दाखल ठेवण्याची तातडीची आवश्यकता नसल्याचे निष्कर्ष काढले. त्यांना तुरुंगात सुरक्षितपणे ठेवता येऊ शकते, असेही डॉक्टरांनी सांगितले. त्यानंतर तुरुंग प्रशासनाने इमरान खान यांना पुन्हा अदियाला तुरुंगात आणले आणि त्यांच्या सेलमध्ये पाठवले. यावेळी सुरक्षेची कडक व्यवस्था करण्यात आली होती. इमरान खान यांना रुग्णालयात नेण्यापूर्वी इस्लामाबाद पोलिसांच्या वरिष्ठ अधिकाऱ्यांनी शिफा इंटरनॅशनल रुग्णालयाला भेट देऊन सुरक्षा व्यवस्थेचा आढावा घेतला. रुग्णालयाबाहेरही मोठ्या संख्येने पोलिसांचा बंदोबस्त तैनात करण्यात आला होता. रुग्णालयातील सूत्रांनी दिलेल्या माहितीनुसार, इमरान खान यांची वैद्यकीय तपासणी तसेच गरज भासल्यास त्यांना रुग्णालयात दाखल करण्यासाठी विशेष व्यवस्था करण्यात आली होती. त्यानंतर खान यांना उपचारांसाठी रुग्णालयात आणण्यात आले.
दरम्यान, इमरान खान यांना बनी गाला येथे हलवण्यासह परदेशात उपचारासाठी पाठवण्याच्या पर्यायांवरही चर्चा सुरू झाली आहे. पीटीआयचे म्हणणे आहे की, तुरुंगातील परिस्थितीचा त्यांच्या आरोग्यावर विपरीत परिणाम होत आहे. पक्षाने सर्वोच्च न्यायालयाच्या आदेशाचे स्वागत करत हा निर्णय आशेचा नवा किरण असल्याचे म्हटले आहे. इमरान खान यांना एप्रिल २०२२ मध्ये अविश्वास ठरावाद्वारे पंतप्रधानपदावरून हटवण्यात आले होते. त्यानंतर त्यांच्याविरोधात अनेक कायदेशीर प्रकरणे दाखल झाली आणि त्यांच्या अडचणी सातत्याने वाढत गेल्या. ऑगस्ट २०२३ पासून ते तुरुंगात आहेत. त्यांना अनेक प्रकरणांमध्ये दोषी ठरवण्यात आले आहे. इमरान खान आणि त्यांच्या पक्षाकडून या सर्व प्रकरणांना राजकीय हेतूने प्रेरित असल्याचा आरोप करण्यात आला आहे. पीटीआयचा दावा आहे की, इमरान खान यांना राजकीय कारणांमुळे लक्ष्य केले जात आहे. दुसरीकडे, सरकार आणि सरकारी पक्षाचे म्हणणे आहे की, त्यांच्यावरील आरोप ही कायदेशीर प्रक्रियेचा भाग आहेत.
