मुख्यमंत्र्यांच्या सुरक्षेशी संबंधित कागदपत्रे जप्त
बर्धमान : पश्चिम बंगालमधील पूर्व बर्धमान जिल्ह्यात स्पेशल टास्क फोर्स (एसटीएफ) आणि जिल्हा पोलिसांनी संयुक्त कारवाई करत जैश-ए-मोहम्मदशी संबंधित मोहम्मद हामिद याला अटक केली आहे. आरोपीकडून व्हीआयपी हालचाली आणि सुरक्षा व्यवस्थेशी संबंधित काही कागदपत्रे जप्त करण्यात आल्याची माहिती तपास यंत्रणांनी दिली आहे. प्राथमिक तपासानुसार, जप्त करण्यात आलेल्या कागदपत्रांमध्ये मुख्यमंत्री शुभेंदू अधिकारी यांच्या हालचालींशी संबंधित माहिती असल्याचा दावा करण्यात आला आहे. या आधारे संभाव्य कटाचा संशय व्यक्त करण्यात आला असला, तरी अशा कोणत्याही कटाची अधिकृत आणि अंतिम पुष्टी अद्याप झालेली नाही.बर्धमानमधील रेनेसां हाउसिंग संकुलातील भाड्याच्या घरावर शुक्रवारी सकाळी छापा टाकून आरोपीला ताब्यात घेण्यात आले. त्याला न्यायालयात हजर करण्यात आले असून पुढील चौकशीसाठी पोलिस कोठडीची मागणी करण्यात आली आहे. तपासात समोर आलेल्या माहितीनुसार, हामिद यापूर्वी हावडा येथील पिलखाना परिसरातील वस्त्र कारखान्यात काम करत होता. सुमारे दोन महिन्यांपूर्वी तो बर्धमानमध्ये राहण्यासाठी आला होता.
गुप्तचर यंत्रणांच्या माहितीनुसार, त्याचे पाकिस्तानस्थित दहशतवादी संघटना जैश-ए-मोहम्मदशी आणि पुलवामा हल्ल्याचा कथित सूत्रधार सज्जाद भट गटाशी संबंध असल्याचा संशय तपासला जात आहे.स्थानिकांच्या माहितीनुसार, आरोपी आपल्या कुटुंबासह राहत होता आणि परिसरात त्याचा फारसा वावर नव्हता. या प्रकरणाच्या पार्श्वभूमीवर राज्यातील सुरक्षा व्यवस्था अधिक सतर्क करण्यात आली असून एसटीएफ आणि पश्चिम बंगाल पोलिस संपूर्ण नेटवर्कचा तपास करत आहेत.दरम्यान, भाजपचे प्रवक्ते देबजीत यांनी पश्चिम बंगालमध्ये कट्टरतावादी गटांच्या हालचालींबाबत राज्य सरकारवर टीका केली आहे.
