कोलकाता : पश्चिम बंगालच्या दक्षिण २४ परगणा जिल्ह्यातील बकखाली किनाऱ्याजवळ बेपत्ता झालेला ‘मा काली’ हा मासेमारीचा ट्रॉलर शोधण्यात आला आहे. ट्रॉलरमधून रविवारी उशिरा रात्री आणखी चार मच्छीमारांचे मृतदेह बाहेर काढण्यात आले. यापूर्वी रविवारी पाच मृतदेह सापडले होते. त्यामुळे या दुर्घटनेतील मृतांची संख्या नऊवर पोहोचली असून, सहा मच्छीमार अद्याप बेपत्ता आहेत. त्यांचा शोध सुरू आहे.
प्रशासकीय अधिकारी आणि मच्छीमारांनी संपूर्ण रात्र ट्रॉलरच्या आत आणि परिसरात सघन शोधमोहीम राबवली. दुर्घटनेच्या वेळी काही मच्छीमार समुद्रातील उंच लाटांमध्ये वाहून गेले असावेत, अशी शक्यता व्यक्त करण्यात येत आहे. या घटनेची माहिती मुख्यमंत्री यांना देण्यात आली असून, पुढील कारवाईबाबत विचार सुरू आहे.
रविवारी रात्री सुंदरबन विकास विभागाचे राज्यमंत्री दीपंकर जाना घटनास्थळी पोहोचले. त्यांनी पाथरप्रतिमा येथील गोवर्धनपूर कोस्टल पोलीस ठाण्याच्या हद्दीतील सीतारामपूर घाटावर सुरू असलेल्या मदत आणि बचावकार्यावर संपूर्ण रात्र देखरेख ठेवली. यावेळी काकद्वीप उपविभागीय प्रशासन, सुंदरबन पोलीस, गोवर्धनपूर कोस्टल पोलीस ठाणे, वन विभाग तसेच मच्छीमार संघटनांचे प्रतिनिधी उपस्थित होते.
मिळालेल्या माहितीनुसार, दीघा येथील शंकरपूर बंदरातून २ जुलै रोजी ‘मा काली’ हा ट्रॉलर मासेमारीसाठी समुद्रात रवाना झाला होता. ५ जुलैनंतर ट्रॉलरशी संपर्क तुटला. त्यानंतर पोलीस, तटरक्षक दल, नौदल, वन विभाग आणि मच्छीमार संघटनांनी संयुक्तपणे शोधमोहीम सुरू केली.
उल्लेखनीय म्हणजे, गेल्या रविवारी दक्षिण २४ परगणा जिल्ह्यातील बकखाली किनाऱ्यापासून सुमारे ३५ किलोमीटर अंतरावर चुलकाठी जंगलाजवळील बाघेरचर परिसरात हा ट्रॉलर उलटलेल्या अवस्थेत आढळला. संयुक्त शोधमोहीमेनंतर ट्रॉलरला सीतारामपूर घाटावर आणण्यात आले. तेथे तपासणीदरम्यान एकामागून एक नऊ मच्छीमारांचे मृतदेह सापडले. सध्या बेपत्ता असलेल्या सहा मच्छीमारांचा शोध सुरू आहे.
