सिनसिनाटी : अमेरिकन टेनिसपटूकोको गॉफने स्वदेशीय जेसिका पेगुलाचा पराभव करून आपले दुसरे सिनसिनाटी ओपन विजेतेपद पटकावले. अंतिम सामन्यात तिने चौथ्या मानांकित गॉफने पेगुलाचा ६-२, ६-४ अशा सरळ सेट्समध्ये पराभव केला.
या स्पर्धेच्या ५६ वर्षांच्या इतिहासात दोन अमेरिकन टेनिसपटूंमधील हा पहिलाच अंतिम सामना होता. या विजयामुळे, गॉफने ओपन युगातील सिनसिनाटी ओपन अनेक वेळा जिंकणाऱ्या खेळाडूंच्या एलिट यादीत स्थान मिळवले. तिच्या आधी सेरेना विल्यम्स आणि व्हिक्टोरिया अझारेन्का यांनी हा पराक्रम केला आहे.
पहिल्या सेटमध्ये गॉफने जोरदार सुरुवात करत अवघ्या ३० मिनिटांत ५-० अशी आघाडी घेतली. पेगुलाने पुनरागमन करण्याचा प्रयत्न केला, पण गॉफने पहिला सेट ६-२ ने जिंकला.दुसऱ्या सेटमध्येही गॉफने आपले वर्चस्व कायम ठेवले. आठव्या गेममध्ये तिला सामना जिंकता आला नसला तरी, पुढच्याच गेममध्ये तिने पेगुलाची सर्व्हिस मोडून सामना जिंकला. हा सामना ७४ मिनिटे चालला.
विजयानंतर गॉफ म्हणाली की, हा तिच्यासाठी एक मोठा प्रवास होता, पण मिळालेल्या यशाने ती आनंदी आहे. ती म्हणाली की, गेल्या वर्षीच्या तुलनेत तिच्या खेळात लक्षणीय बदल झाला आहे आणि सिनसिनाटीमध्ये मिळालेला चांगला फॉर्म ती आगामी अमेरिकन ओपनमध्ये वापरण्याचा प्रयत्न करेल.
२०२५ च्या अमेरिकन ओपनच्या उपांत्यपूर्व फेरीत गॉफ जस्मिन पाओलिनीकडून पराभूत झाली होती. त्यावेळी तिने आपल्या कामगिरीबद्दलृ निराशा व्यक्त केली होती, पण आता तिने आपल्या कारकिर्दीतील चौथे डब्ल्यूटीए १००० विजेतेपद पटकावले आहे. पेगुलानेही गॉफच्या कामगिरीचे कौतुक केले आणि ती अत्यंत उच्च दर्जाचा टेनिस खेळत असल्याचे म्हटले. तिने गॉफच्या हालचालींना तिची सर्वात मोठी ताकद म्हटले आणि तिच्याविरुद्ध खेळणे अत्यंत कठीण असल्याचे सांगितले.
