नवी दिल्ली : दिल्ली न्यायालयाने भारतीय कुस्ती महासंघाचे माजी अध्यक्ष ब्रिजभूषण शरण सिंग यांची महिला कुस्तीपटूंच्या लैंगिक छळाच्या प्रकरणात निर्दोष मुक्तता केली. यावर विनेश फोगटने सोशल मीडियावर एक पोस्ट शेअर करून प्रतिक्रिया दिली. आपल्या पोस्टमध्ये विनेशने लिहिले, “सत्ताधारी पक्षाच्या एका शक्तिशाली नेत्याविरुद्ध रस्त्यावर उतरून एफआयआर दाखल करण्यासाठी आम्हाला खूप धाडस लागले. आपल्या सत्तेचा आणि बाहुबली शक्तीचा वापर करून, ब्रिजभूषणने अनेक महिलांना धमकावून त्यांची नावे मागे घ्यायला लावली. पण, अनेक महिला कुस्तीपटू उभ्या राहिल्या आणि न्यायालयात ब्रिजभूषणविरुद्ध लढा देत राहिल्या. महिला कुस्तीपटूंनी केलेल्या लैंगिक छळाच्या आरोपांमध्ये न्यायालयाने ब्रिजभूषण शरण सिंग यांना दोषी ठरवले नाही, याचे आम्हाला खूप दुःख आहे.”
महिला कुस्तीपटू पुढे म्हणाली, “अगदी सुरुवातीपासूनच, संपूर्ण यंत्रणा, सरकार आणि व्यवस्था ब्रिजभूषणच्या संरक्षणासाठी काम करत आहेत. महिला कुस्तीपटूंनी त्यांच्या वकिलांना या निर्णयाविरोधात अपील करण्याचे निर्देश दिले आहेत आणि हे शक्य तितक्या लवकर केले जाईल. आम्ही आशा सोडलेली नाही आणि कुस्तीपटू लढा सुरूच ठेवतील.” भारतीय कुस्ती महासंघाचे माजी प्रमुख ब्रिजभूषण शरण सिंग हे या प्रकरणातील निकालापूर्वी सोमवारी सकाळी दिल्लीच्या राऊस ॲव्हेन्यू न्यायालयात पोहोचले होते. ते म्हणाले, “न्यायालय जे काही सांगेल, तेच न्यायालय सांगेल. आम्ही आता भाष्य करणार नाही.” न्यायालयाने सुनावणी सुरू करताच, अतिरिक्त मुख्य न्यायदंडाधिकारी (एसीजेएम) अश्विनी पनवार यांनी ब्रिजभूषण शरण सिंग यांची निर्दोष मुक्तता जाहीर केली. सहआरोपी विनोद तोमर यांचीही निर्दोष मुक्तता करण्यात आली. न्यायालयाने २ जुलै रोजी या प्रकरणातील आपला निर्णय राखून ठेवला होता.
