भाजपकडून जाहीर करण्यात आली उमेदवारी
नवी दिल्ली : भारतीय जनता पक्षाने (भाजप) बुधवारी केंद्रीय मंत्री हरदीप सिंग पुरी यांना मध्य प्रदेशातून होणाऱ्या राज्यसभा पोटनिवडणुकीसाठी पक्षाचे उमेदवार म्हणून घोषित केले. भाजपचे ज्येष्ठ नेते एल. मुरुगन यांनी राज्यसभेच्या सदस्यत्वाचा राजीनामा दिल्यानंतर ही जागा रिक्त झाली होती. हरदीप सिंग पुरी हे पंतप्रधान नरेंद्र मोदी यांच्या मंत्रिमंडळातील महत्त्वाचे सदस्य असून, ते सध्या केंद्रीय पेट्रोलियम आणि नैसर्गिक वायू मंत्रालयाची जबाबदारी सांभाळत आहेत. मुरुगन यांच्या राजीनाम्यानंतर या जागेवर पोटनिवडणूक घेण्यात येत आहे.पुरी यांची उमेदवारी जाहीर झाल्यामुळे केंद्रातील राष्ट्रीय लोकशाही आघाडी (एनडीए) सरकारमधील संभाव्य मंत्रिमंडळ फेरबदलाबाबत सुरू असलेल्या चर्चांनाही वेगळे वळण मिळाले आहे. मुरुगन यांच्या राज्यसभा सदस्यत्वाच्या राजीनाम्यानंतर राजकीय वर्तुळात विविध तर्कवितर्क व्यक्त केले जात होते.
हरदीप सिंह पुरी यापूर्वी उत्तर प्रदेशातून बिनविरोध राज्यसभेवर निवडून आले होते. त्यांचा सध्याचा राज्यसभा कार्यकाळ नोव्हेंबरमध्ये संपणार आहे. भाजपने उत्तर प्रदेशातील राज्यसभा निवडणुकीसाठी आठ उमेदवारांची नावे जाहीर केली होती; मात्र त्या यादीत पुरी यांचा समावेश नव्हता.भाजपने यापूर्वीही पुरी यांना २ वेळा राज्यसभेवर पाठवले आहे. त्यांनी लोकसभा निवडणूकही लढवली होती; मात्र त्या निवडणुकीत त्यांना पराभवाचा सामना करावा लागला होता. आता मध्य प्रदेशातून राज्यसभेवर निवडून येण्यासाठी पुरी यांना पोटनिवडणुकीच्या प्रक्रियेला सामोरे जावे लागणार आहे. या निवडणुकीच्या निकालाकडे राजकीय वर्तुळाचे लक्ष लागले आहे.
