मुंबई : अभिनेता यश आता ‘रामायण’ चित्रपटात पडद्यामागेही महत्त्वाची भूमिका बजावणार आहे. चित्रपटात रावणाची भूमिका साकारणाऱ्या यशच्या मॉन्स्टर माइंड क्रिएशन्स या कंपनीची वितरण शाखा कर्नाटकात चित्रपटाच्या प्रदर्शनाची जबाबदारी सांभाळणार आहे. नमित मल्होत्रा यांच्यासोबत या महाकाव्यावर आधारित चित्रपटाच्या निर्मितीत सहभागी असलेल्या यशच्या कंपनीने आता वितरण क्षेत्रातही पाऊल ठेवले आहे. त्यामुळे चित्रपटाच्या निर्मिती आणि वितरणातील कंपनीची भूमिका अधिक व्यापक होणार आहे.
नितेश तिवारी यांच्या दिग्दर्शनाखाली तयार होत असलेला ‘रामायण’ हा चित्रपट दोन भागांत मोठ्या पडद्यावर प्रदर्शित केला जाणार आहे. भारतीय महाकाव्यावर आधारित या चित्रपटातून भव्य स्तरावर कथा जिवंत करण्याची तयारी सुरू आहे. या चित्रपटात यश रावणाच्या भूमिकेत दिसणार आहे. चित्रपटातील कलाकारांची मोठी फळी आणि भव्य स्तरावर सुरू असलेली निर्मिती यामुळे प्रेक्षकांमध्ये चित्रपटाबद्दलची उत्सुकता वाढत आहे. मॉन्स्टर माइंड क्रिएशन्सच्या वितरण व्यवसायाची सुरुवात हा कंपनीच्या विस्ताराच्या दिशेने महत्त्वाचा टप्पा मानला जात आहे.
चित्रपटाच्या वितरणाची जबाबदारी विविध विभागांनुसार निश्चित करण्यात आली आहे. आंतरराष्ट्रीय वितरणाची जबाबदारी सोनी पिक्चर्स सांभाळणार आहे, तर उत्तर भारतात धर्मा प्रॉडक्शन्स हा चित्रपट प्रदर्शित करणार आहे. आंध्र प्रदेश आणि तेलंगणामधील वितरणाची जबाबदारी दिल राजू यांच्याकडे असेल. कर्नाटकात मॉन्स्टर माइंड क्रिएशन्सची वितरण शाखा ही जबाबदारी सांभाळणार आहे. तामिळनाडूमध्ये थिंक स्टुडिओज, तर केरळमध्ये मुकेश मेहता यांच्या नेतृत्वाखालील ई४ एंटरटेनमेंट चित्रपटाच्या प्रदर्शनाची जबाबदारी पार पाडणार आहे. ‘रामायण’ हा चित्रपट ५ नोव्हेंबर रोजी जगभरातील चित्रपटगृहांमध्ये प्रदर्शित होणार आहे.
