बेंगळुरू-हुबळी-पुणे बुलेट ट्रेन प्रकल्पाची घोषणा, बेंगळुरू-मंगळुरू वंदे भारत रेल्वे चार-पाच आठवड्यांत होणार सुरू
बेंगळुरू : रेल्वेमंत्री अश्विनी वैष्णव यांनी बेंगळुरू-मुंबईदरम्यान हुबळी मार्गे दुसरी वंदे भारत स्लीपर रेल्वे सुरू करण्यासोबतच बेंगळुरू-हुबळी-पुणे दरम्यान बुलेट ट्रेन मार्गिका विकसित करण्याच्या योजनेची घोषणा केली आहे. याशिवाय, बहुप्रतीक्षित बेंगळुरू-मंगळुरू वंदे भारत रेल्वे पुढील चार-पाच आठवड्यांत सुरू होण्याची शक्यता आहे. रेल्वेमंत्री वैष्णव यांनी रविवारी बेंगळुरू येथील एसएमव्हीटी रेल्वे स्थानकावर बेंगळुरू-मुंबई वंदे भारत स्लीपर रेल्वेला हिरवा झेंडा दाखवून रवाना केले. यावेळी त्यांनी कर्नाटकातील रेल्वे संपर्क आणि पायाभूत सुविधांच्या विकासासाठी प्रस्तावित योजनांची माहिती दिली.
बेंगळुरू आणि मुंबईदरम्यान हुबळी मार्गे धावणाऱ्या नवीन वंदे भारत स्लीपर रेल्वेमुळे उत्तर कर्नाटकातील प्रवाशांना विशेष सुविधा मिळणार आहे. हुबळीसह या रेल्वेमार्गावरील विविध शहरांतील प्रवाशांना बेंगळुरू आणि मुंबईदरम्यान जलद आणि आरामदायी रेल्वे प्रवासाचा पर्याय उपलब्ध होणार आहे. रेल्वेमंत्र्यांनी बेंगळुरू-हुबळी-पुणे दरम्यान अतिजलद बुलेट ट्रेन मार्गिका विकसित करण्याचीही घोषणा केली. केंद्र सरकारच्या दुसऱ्या टप्प्यातील तीन हजार किलोमीटर लांबीच्या अतिजलद रेल्वे प्रकल्पात या मार्गाचा समावेश करण्यात येणार आहे. यामुळे कर्नाटकची राजधानी बेंगळुरू, उत्तर कर्नाटकातील प्रमुख शहर हुबळी आणि महाराष्ट्रातील पुणे यांच्यात जलद रेल्वे संपर्क प्रस्थापित करण्याचा मार्ग मोकळा होणार आहे.
कर्नाटकातील अंतर्गत भाग आणि उत्तर कर्नाटकाला अतिजलद रेल्वे जाळ्याशी जोडण्याची मागणी अनेक वर्षांपासून केली जात होती. याच पार्श्वभूमीवर बेंगळुरू-हुबळी-पुणे मार्गाचा दुसऱ्या टप्प्यातील प्रकल्पात समावेश करण्याची घोषणा करण्यात आली आहे. किनारपट्टीवरील कर्नाटकातील प्रवाशांची अनेक दिवसांपासूनची प्रतीक्षा असलेली बेंगळुरू-मंगळुरू वंदे भारत रेल्वेही लवकरच सुरू होणार आहे. रेल्वेमंत्र्यांनी सांगितले की, या मार्गावरील आवश्यक तांत्रिक चाचण्या आणि प्रायोगिक फेऱ्या यशस्वीरीत्या पूर्ण करण्यात आल्या आहेत. पुढील चार-पाच आठवड्यांत या रेल्वेची नियमित सेवा सुरू होण्याची अपेक्षा आहे.
यापूर्वी पहिल्या टप्प्यातील चार हजार किलोमीटर लांबीच्या अतिजलद रेल्वे प्रकल्पांतर्गत बेंगळुरू-चेन्नई आणि बेंगळुरू-हैदराबाद मार्गिकांची घोषणा करण्यात आली होती. हे प्रकल्प पूर्ण झाल्यानंतर बेंगळुरूहून चेन्नईला जाण्यासाठी सुमारे ७३ मिनिटे, तर हैदराबादला पोहोचण्यासाठी दोन तास दहा मिनिटे लागतील, असा अंदाज आहे. बेंगळुरू-मुंबई वंदे भारत स्लीपर रेल्वेमध्ये एकूण १६ डबे असतील. यामध्ये आठ मोटर डबे, चार ट्रेलर डबे, दोन नॉन-ड्रायव्हिंग ट्रेलर डबे आणि दोन ड्रायव्हिंग ट्रेलर डबे यांचा समावेश असेल. या कार्यक्रमाला केंद्रीय रेल्वे राज्यमंत्री व्ही. सोमण्णा, केंद्रीय मंत्री प्रल्हाद जोशी, एच. डी. कुमारस्वामी, खासदारांसह अनेक मान्यवर उपस्थित होते.
