इस्लामाबाद : पाकिस्तानच्या नैऋत्येकडील बलुचिस्तान प्रांताची राजधानी क्वेटा शहराच्या बाहेरील भागातील एका कोळसा खाणीत झालेल्या भीषण स्फोटात किमान ३२ कामगारांचा मृत्यू झाला असून, आणखी १० कामगार अद्याप जमिनीखाली अडकलेले आहेत. अधिकाऱ्यांच्या माहितीनुसार, त्यांची स्थिती अत्यंत गंभीर असून बचावकार्य युद्धपातळीवर सुरू आहे. सरकारी खाण निरीक्षक गनी बलोच यांनी सांगितले की, प्राथमिक तपासात खाणीत मिथेन वायू मोठ्या प्रमाणात साचल्यामुळे हा स्फोट झाल्याचे समोर आले आहे. दुर्घटनेनंतर काही तासांत सात कामगारांचे मृतदेह बाहेर काढण्यात आले, तर त्यानंतर आणखी चार मृतदेह सापडले. सर्व अडकलेल्या कामगारांचा शोध लागेपर्यंत बचाव मोहीम सुरू राहील, असे गनी बलोच यांनी स्पष्ट केले. मात्र, मृतांचा आकडा आणखी वाढण्याची शक्यता त्यांनी व्यक्त केली.त्यांच्या म्हणण्यानुसार, मिथेन वायूच्या स्फोटानंतर खाणीतील ऑक्सिजनची पातळी जवळपास शून्यावर येते. त्यामुळे आत अडकलेल्या व्यक्ती जिवंत सापडण्याची शक्यता वेळेनुसार कमी होत जाते. याच कारणामुळे बचाव पथके अत्यंत सावधगिरीने पुढे सरकत आहेत.
बलुचिस्तानचे खाण व खनिज मंत्री शोएब नोशेरवानी यांनी सांगितले की, बचाव पथके अतिशय कठीण परिस्थितीत काम करत असून प्रांतीय सरकारकडून सर्वतोपरी मदत पुरवली जात आहे. त्यांनी मृत कामगारांच्या कुटुंबीयांप्रती शोकसंवेदना व्यक्त करत प्रत्येक मृत कामगाराच्या कुटुंबाला पाच लाख पाकिस्तानी रुपयांची आर्थिक मदत जाहीर केली. तसेच, या स्फोटाच्या कारणांची सखोल चौकशी करण्यात येईल आणि भविष्यात अशा दुर्घटना टाळण्यासाठी खाणींमधील सुरक्षा व्यवस्थेचा आढावा घेतला जाईल, असेही त्यांनी सांगितले.दरम्यान, कोळसा खाण कामगार संघटनांनी हा अपघात निष्काळजीपणामुळे घडल्याची शक्यता व्यक्त केली आहे. पाकिस्तान सेंट्रल माइन्स लेबर फेडरेशनने सरकारकडे खाण सुरक्षा नियमांची कठोर अंमलबजावणी करण्याची मागणी केली असून, नियमांचे उल्लंघन करणाऱ्या कंपन्यांवर कडक कारवाई करण्याचे आवाहन केले आहे.
विशेषतः बलुचिस्तानमधील पाकिस्तानच्या कोळसा खाण उद्योगात अशा प्रकारच्या दुर्घटना वारंवार घडत असतात. अनेक खाणींमध्ये पुरेशी वायुवीजन व्यवस्था, वायू निरीक्षण प्रणाली तसेच इतर मूलभूत सुरक्षा उपायांचा अभाव असल्याचे सांगितले जाते. कामगार संघटनांचा दीर्घकाळापासून आरोप आहे की, खाण मालक सुरक्षा नियमांचे पालन करत नाहीत आणि कामगारांना आवश्यक सुरक्षा साधनेही उपलब्ध करून देत नाहीत. तरीही कमी वेतन आणि धोकादायक कामाच्या वातावरणात हजारो कामगार आपल्या उदरनिर्वाहासाठी या उद्योगावर अवलंबून आहेत.
