काँग्रेसचा हिंदूविरोधी अजेंडा पुढे नेण्याचा भाजपकडून आरोप
नवी दिल्ली : डाव्या विद्यार्थी संघटनेच्या नेहा बोरा हिने पुजारी आणि ब्राह्मणवादी व्यवस्थेबाबत केलेल्या वक्तव्यामुळे नवा राजकीय वाद निर्माण झाला आहे. नेहाच्या विधानावर आक्षेप घेत भाजपने काँग्रेसवर जोरदार टीकास्त्र सोडले असून, हिंदू धर्माला बदनाम करण्याचा आणि काँग्रेसचा कथित हिंदूविरोधी अजेंडा पुढे नेण्याचा आरोप केला आहे. भाजपचे राष्ट्रीय प्रवक्ते प्रदीप भंडारी यांनी नेहा बोराच्या वक्तव्याचा व्हिडिओ सोशल मीडिया प्लॅटफॉर्म ‘एक्स’वर शेअर करत त्यांच्यावर टीका केली. नेहा बोरा हिला राहुल गांधी यांच्याशी जोडत त्यांनी, त्यांची वक्तव्ये राहुल गांधी यांच्या भूमिकेशी मिळतीजुळती असल्याचा आरोप केला. काँग्रेसला हिंदूंपेक्षा मतपेढीची अधिक चिंता असल्याची टीकाही तिने केली.
दरम्यान, हा वाद ऑल इंडिया स्टुडंट्स असोसिएशनच्या (आयसा) नेहा बोरा हिने मुख्य निवडणूक आयुक्त ज्ञानेश कुमार यांच्याविरोधातील महाभियोग प्रस्तावाला पाठिंबा देताना केलेल्या वक्तव्यांमुळे सुरू झाला. मतदार यादीतून जाणीवपूर्वक नावे वगळली जात असल्याचा आणि निवडणूक प्रक्रियेचे उल्लंघन होत असल्याचा आरोप करत नेहाने मतदानाच्या पवित्रतेवर प्रश्नचिन्ह उपस्थित केले होते. यानंतर तिने जातिव्यवस्था आणि धार्मिक संस्थांबाबत भाष्य करताना ब्राह्मणवादी व्यवस्थेवर कठोर टीका केली. गरीब, शोषित, महिला आणि प्राण्यांवरील दमनाला ही व्यवस्था जबाबदार असल्याचे तिचे म्हणणे होते. या व्यवस्थेत ब्राह्मण महिलाही सुरक्षित नसल्याचा दावा नेहाने केला होता.
आपल्या वक्तव्याच्या समर्थनार्थ नेहा बोरा हिने जानेवारी २०१८ मधील जम्मू-काश्मीरमधील ८ वर्षांच्या बकरवाल समाजातील मुलीवरील अत्याचार आणि हत्या प्रकरणाचा उल्लेख केला. या प्रकरणात जून २०१९ मध्ये विशेष न्यायालयाने ६ जणांना दोषी ठरवले होते. त्यापैकी तीन जणांना जन्मठेपेची शिक्षा सुनावण्यात आली होती. मात्र, या प्रकरणाचा संदर्भ देताना संपूर्ण समुदायाबाबत व्यापक स्वरूपाचे आरोप केल्याने नेहा बोरा हिच्या वक्तव्यावर सोशल मीडियातूनही टीका होत आहे. दुसरीकडे, भाजपने या विधानाला हिंदू धर्म आणि सनातन परंपरेवरील हल्ला ठरवत काँग्रेसला लक्ष्य केले आहे.
